Foto: LSA / GENT SHKULLAKU
Federata Zvicerane e Futbollit ka mohuar që Rusia t’i ketë kërkuar të mos lejojë tifozët të mbajnë flamuj të Shqipërisë së Madhe apo Kosovës gjatë ndeshjes së ditës së premte me Serbinë në Kaliningrad, siç raportuan disa media serbe.
Foto: LSA / GENT SHKULLAKU
Organi qeverisës për futbollin zviceran ka hedhur poshtë si raporte të pabaza në mediat serbe pretendimin se Rusia i kishte kërkuar Federatës Zvicerane të Futbollit të ndalonte flamujt apo simbolet e “Shqipërisë së Madhe” dhe Kosovës gjatë ndeshjes së së premtes midis Zvicrës dhe Serbisë në Kaliningrad.
“Nuk e kemi idenë se çfarë po shkruani për flamuj, as FIFA-n, as Rusinë në lidhje me flamujt në stadiumin në Kaliningrad të premten,” tha Federata Zvicerane e Futbollit në një deklaratë për BIRN. “Nuk ka aspak asnjë problem,” shtoi ajo.
Ndeshja në Kaliningrad rrethohet nga tensioni etnik – gjë e cila nuk ka të bëjë fare me Zvicrën – për shkak të faktit se katër lojtarë në ekipin zviceran janë me origjinë shqiptare, tre prej tyre nga Kosova – Granit Xhaka, Valon Behrami, Xherdan Shaqiri dhe Blerim Xhemaili.
“Rusia paralajmëroi Federatën Zvicerane të mos lejojë flamuj që kanë lidhje me Shqipërinë e Madhe apo Kosovën,” raportoi të martën gazeta serbe Novosti.
Federata Zvicerane e Futbollit tha se cilado qofshin probleme politike dhe historike midis serbëve dhe shqiptarëve, sporti s’duhet të politizohet.
“Ne s’duam të kemi kurrë mesazhe politike në stadiume, pavarësisht nëse ata janë flamuj apo diçka tjetër,” shkroi federata e sportit.
Në ndeshjen që do të mbahet të premten në orën 20:00 në Rusi, shqiptarët e Kosovës – të cilët nuk kanë një ekip të tyren në Kupën e Botës – po përgatiten të mbështesin ekipin e Zvicrës.
Tensioni midis serbëve dhe shqiptarëve në Ballkan mbetet i lartë, sidomos për çështjen e nxehtë të Kosovës, e cila shpalli pavarësinë nga Serbia në vitin 2008.
Në ndeshjen e famshme të tetorit 2014 në Beograd midis ekipeve kombëtare të Serbisë dhe Shqipërisë, mbi fushë u shfaq një dron me një flamur të “Shqipërisë së Madhe”, duke shkaktuar kaos si në fushë ashtu edhe jashtë saj.
