Presidenti Gjorge Ivanov tha se ai nuk do ta nënshkruajë marrëveshjen e “emrit” me Greqinë, duke pretenduar se ajo s’është në interes kombëtar, por duke qenë se pushteti i tij është i kufizuar, ai nuk mund ta vonojë pafundësisht këtë progres.
Ivanov tha të martën se ai ka vendosur të mos nënshkruajë marrëveshjen e arritur midis qeverive në Shkup dhe Athinë dhe të ratifikuar nga parlamenti maqedonas javën e kaluar, e cila pritet të zhbllokojë progresin e zvarritur të vendit drejt anëtarësimit në NATO dhe BE.
Ai këmbënguli se marrëveshja shkel kushtetutën dhe se ajo e vendos vendin e tij në varësi të një shteti të huaj.
“Unë nuk e pranoj ndryshimin kushtetues që synon ndryshimin e emrit kushtetues të vendit. Nuk pranoj ide apo propozime që do të vinin në rrezik identitetin kombëtar të Maqedonisë, individualitetin e kombit maqedonas, gjuhën maqedonase dhe modelin e bashkëjetesës maqedonase,” tha Ivanov në një komunikatë për shtyp duke cituar pjesë të platformës së tij elektorale që nga viti 2014.
Presidenti i Maqedonisë mund të vonojë, por jo të ndalë përparimin e marrëveshjes, pasi pushteti i tij është i kufizuar.
Parlamenti pritet ta votojë përsëri, pas së cilës presidenti ka detyrimin ta nënshkruajë marrëveshjen, edhe pse nuk është specifikuar asnjë afat i qartë. Edhe nëse ai e vonon nënshkrimin, mandati i tij skadon në fillim të vitit të ardhshëm.
Sipas marrëveshjes historike të nënshkruar nga ministrat e jashtëm të të dy vendeve në 17 qershor, Maqedonia do ta ndryshojë emrin e saj në Republika e Maqedonisë së Veriut, në këmbim të anëtarësimit të shpejtë në NATO dhe fillimit të bisedimeve të pranimit në BE.
Parlamentarët maqedonas miratuan të mërkurën marrëveshjen e negociuar gjatë me 69 nga 120 deputetë që votuan pro.
Në këmbim të kësaj, Greqia njoftoi të hënën BE-në dhe NATO-n se nuk e kundërshton më pranimin e fqinjit të saj nën emrin e ri, i i cili do të vihet gjithashtu në një referendum në Maqedoni në vjeshtë.
Kryeministri maqedonas Zoran Zaev të hënën mbështeti idenë e referendumit, duke thënë se ai do të japë dorëheqjen nëse votimi në mbështetje të marrëveshjes dështon.
“Po, do të largohem nga posti nëse referendumi dështon. Por jam i sigurt se ai do të ketë sukses. Pres një përqindje serioze, 75-85 për qind në mbështetje të marrëveshjes, në përputhje me përqindjen e qytetarëve që mbështesin anëtarësimin në BE-në dhe NATO,” tha Zaev në një intervistë me televizionin 1TV të Maqedonisë.
Marrëveshja e emrit, të cilën shumë e kanë quajtur arritje historike, synon të mbyllë mosmarrëveshjen 27-vjeçare midis dy fqinjëve mbi përdorimin e termit Maqedoni.
Megjithatë, marrëveshja ka hasur kundërshtim të fortë nga dy linja të ashpra greke dhe maqedonase të cilët e shohin atë si një disfatë kombëtare.
Athina ka bllokuar rrugën e vendit për anëtarësimin e tij në NATO, duke këmbëngulur se emri Maqedoni nënkupton pretendime territoriale mbi krahinën e saj veriore me të njëjtin emër.
