SHBA dhe disa vende Europiane i bënë thirrje Rumanisë të mos miratojë ligjet e reja që kërcënojnë përpjekjet e vendit për të luftuar korrupsionin ndërkohë që ligjvënësit filluan të debatojnë ndryshimet në kodin ligjor.
Shtetet e Bashkuara dhe 11 vende Europiane i kërkuan ligjvënësve rumunë të mos miratojnë ndryshimet e reja ligjore, të cilat synojnë të pengojnë hetimet antikorrupsion në vend ndërsa parlamenti i Rumanisë nisi të enjten diskutimin e ndryshimeve në kodin penal.
Axhenda e ligjvënësve të partisë në pushtet SocialDemokrate ka ngritur shqetësime mes diplomatëve të huaj dhe ka shkaktuar protesta masive në rrugë, pasi ata miratuan ndryshime në ligje që gjerësisht shihen si kërcënim për sundimin e ligjit.
Deklarata e të enjtes u dërgua në media nga ambasada e SHBA-së në Rumani por u firmos gjithashtu nga përfaqësues të Belgjikës, Kanadasë, Danimarkës, Finlandës, Francës, Gjermanisë, Luksemburgut, Holandës, Norvegjisë, Suedisë dhe Zvicrës.
“Ne, partnerët dhe aleatët ndërkombëtar të Rumanisë, i bëjmë thirrje të gjitha partive të përfshira në amendimin e kodit penal dhe kodit të procedurës penale që të shmangin ndryshime që mund të dobësojnë sundimin e ligjit në Rumani dhe aftësinë e vendit për të luftuar krimin dhe korrupsionin,” shkruhet në deklaratën e diplomatëve.
“Ne po ndjekim nga afër ndryshimet në kodin penal dhe mbetemi të shqetësuar se ka shumë elementë që ka gjasa do të pengojnë bashkëpunimin ndërkombëtar të agjencive ligjzbatuese dhe të ndikojnë negativisht në luftën kundër krimit të dhunshëm, krimit transkombëtar të organizuar, krimeve financiare dhe trafikimit të qenieve njerëzore dhe drogës,” shton deklarata.
Një komisioni parlamentar i kontrolluar nga socialdemokratët të enjten filloi debatimin e amendamenteve të propozuara, përfshirë ndryshime në përkufizimin e asaj që quhet abuzim me detyrën.
Këto lëvizje kanë alarmuar aktivistët anti-korrupsion dhe partitë në opozitë, ndërsa Gjykata Supreme të enjten e kaluar dënoi udhëheqësin socialdemokrat Liviu Dragne me tre vjet e gjysmë burg për abuzim me detyrën, në një vendim të shkallës së parë.
Deputeti socialdemokrat Claudiu Manda i tha gazetarëve pas deklaratës së ambasadave se të gjitha ndryshimet në legjislacion po hartohen me kujdes për të marrë parasysh rekomandimet e Gjykatës Kushtetuese dhe Komisionit të Venecias.
“Nëse ne bëjmë një gabim, ligjet do të dërgohen në Gjykatën Kushtetuese dhe gjykata do të shprehë opinionin e vet,” i tha ai gazetarëve në parlament.
Partia në pushtet në Rumani ka marrë disa paralajmërime të tilla që kur erdhi në pushtet në dhjetor 2016 nga institucionet ndërkombëtare dhe diplomatët, pasi parlamenti shtyu përpara ndryshimet duke filluar nga janari 2017.
