Ndonëse të shokuar nga veprimet e qeverisë për të miratuar me nxitim projektligjin për teatrin, artistët dhe qytetarët protestues, shpallën se tashmë fillon lufta e vërtetë dhe se ata janë të vendosur të rezistojnë deri në tërheqje të qeverisë për teatrin kombëtar.
Të shokuar nga kalimi në parlament i projektligjit për teatrin, një grup artistësh u mblodhën të enjten në mbrëmje të shoqëruar nga dhjetëra qytetarë në sheshin pranë Teatrit Kombëtar. Ata shprehën vendosmërinë të ruajnë teatrin nga planet e qeverisë për shembje.
Artistët, të cilët kanë protestuar çdo ditë për rreth dy javë pranë Teatrit, e quajtën vjedhje planin që qeveria po e shet si një partneritet me privatin për ndërtimin e një teatri të ri, kundrejt shkëmbimit të një pjese të pacaktuar toke publike.
“Jam pa tekst,” u shpreh drejtuesi i Sindikatës së Aktorëve të Skenës dhe të Ekranit, regjisori Alert Çeloaliaj.
“Është njësoj sikur të më ketë ndodhur ndonjë fatkeqësi, sikur më ka vdekur njeri në shtëpi,” shtoi ai, duke komentuar vendimin e qeverisë për votim të përshpejtuar të projektligjit të jashtëzakonshëm për teatrin në parlament.
“Qëndrimi i shumicës së anëtarëve të SASE është që ne jemi pro ndërtimit të një teatri të ri diku tjetër dhe restaurimit të teatrit kombëtar për vlerat kulturore që ai mbart,” njoftoi ai.
Regjisori Robert Budina mori mikrofonin për t’i bërë thirrje deputetëve socialistë të mos e kalojnë ligjin që sipas tij i bën vendit një masakër, ndërsa deputeti i PD Agron Shehaj u shpreh se opozita nuk kishte votat për ta penguar projektligjin dhe se do t’i bashkohej qytetarëve nëse ngujoheshin në godinë.
“Sot më tepër se kurrë kam kuptuar se në zanatin tonë, talenti është një dhunti, por të jesh i lirë është një zgjedhje, t’i thuash jo vjedhjes është një zgjedhje, të kundërshtosh diktaturën është një zgjedhje që mund ta bëjë kushdo,” tha aktori Gentian Zenelaj.
“Sot është një ditë shumë e trishtë,” vazhdoi ai. “Në këtë shtet kam vendosur të rris fëmijët e mi, paguaj taksa me ballin lart, kam parë si është përdhosur e drejta, si është përdhosur ligji, si janë zbythur të gjitha vlerat që mund të ketë një komb,” tha ai.
“Kam parë si tradhtia ndodh natën dhe ditën shitet si kompromis,” vazhdoi Zenelaj. “Kjo tokë sot u vodh,” përfundoi ai, ndërsa aktorët e tjetër dëgjonin të ngrysur dhe të përlotur.
Artistët e nxitën presidentin të mos e dekretojë ligjin nëse ai kalohet nga deputetët e Partisë Socialiste dhe për i bënë thirrje qytetarëve të bashkohen në protestat e tyre për të mos lejuar politikanët të shkelin ligjin dhe të vjedhin pronën publike.
“Shoh gocat që po qajnë dhe duket si përshpirtje. Jo, jo nuk është përshpirtje! Ne i tronditëm, ne i bëjmë minjtë të lëvizin natën,” tha aktori Neritan Liçaj, duke komentuar miratimin e qeverisë për përshpejtimin e procedurës së projektligjit.
“Unë këtë nuk e lë të prishet sikur nami të bëhet! “Hajdeni zotërinj të parasë, hajdeni policë, këtu na keni!” shtoi Liçaj i pritur me duartrokitje.
“Jemi në vitin e trashëgimisë kulturore, por ky në fakt është viti i varrimit të trashëgimisë kulturore dhe kjo është fare e qartë,” tha në protestë aktivisti Erjon Kristo.
“Këtu është farkëtuar ndërgjegjja e kombit, ky është universiteti i kombit,” shtoi ai, duke pyetur përse kryeprokuroria nuk e heton aferën e teatrit kombëtar.
Ndërsa lexonte një fragment nga romani distopik “1984” i Xhorxh Oruell, gazetarja e kulturës Elsa Demo tha se libri ishte një ilustrim i shkëlqyer i asaj që Erion Veliaj po bën me mediat dhe qytetarët.
“Edi Rama, Mirela Kumbaro, një thirrje të fundit: tërhiquni!” përfundoi fjalën ajo.
Aktivistët shpallën nisjen e një peticioni masiv kundër shembjes së teatrit kombëtar dhe faljes së pronës te një kompani private.
“Protestat do të vazhdojnë si zakonisht dhe më të shumtë në numër,” lajmëruan ata.
Më herët të enjten, drama e teatrit kombëtar u përshkallëzua nga dialogu në shpallje të papritur kompromisi, në vendim për procedurë të përshpejtuar nga qeveria dhe miratim të kësaj procedure në parlament nga 74 deputët të partisë socialiste.
Projektligji pritet të votohet të enjten e radhës në parlamentin ku PS ka maxhorancë.
Nxitimi i qeverisë dhe bashkisë për të çuar përpara shembjen e teatrit kombëtar dhe dhënien te një kompani e paracaktuar pa garë në shkelje të ligjit, si dhe denoncimi se të paktën një nga firmat e peticionit të artistëve që kërkonin shembjen qe e falsifikuar, e kanë damkosur projektin si të dyshimtë dhe aspak transparent.
