Kreu i Gjykatës së Krimeve të Rënda kishte refuzuar dorëheqjen e relatorit të çështjes ndaj gjykatësit të arrestuar për korrupsion, por prokuroria pasi u njoh me situatën kërkon përjashtimin e tij. Gjykatësi pranoi se kishte njohje me Mirin dhe bashkëshorten e tij.
Kryetari i Gjykatës së Krimeve të Rënda refuzoi një kërkesë për dorëheqje të gjykatësit Ardit Mustafai, relator i çështjes ndaj ish-gjyqtarit të Apelit Tiranë Shkëlqim Miri dhe tre të pandehurve të tjerë të akuzuar për korrupsion aktiv dhe pasiv, por prokuroria kërkoi përjashtimin e tij duke e cilësuar situatën e tij “konflikt interesi”.
Gjyqi ndaj Mirit, i cili u arrestua në nëntor 2017, pas ngritjes së akuzave për korrupsion pasiv, filloi këtë të martë, por seanca u shty tashmë për të shqyrtuar kërkesën e prokurorisë për përjashtim të gjykatësit.
Në fillim të seancës relatori i çështjes gjyqtari Ardit Mustafai njoftoi se kishte paraqitur dorëheqjen për të mos gjykuar këtë dosje. Ai tha se dorëheqja i është kërkuar kryetarit të Gjykatës së Krimeve të Rënda pasi Mustafai thotë se ka njohje personale me të pandehurin Miri, njëherësh me bashkëshorten e këtij të fundit ka lidhje gjaku dhe bien kushërinj.
Por gjyqtari Mustafai, pohoi se kjo kërkesë e tij nuk ishte pranuar nga kryetari i Gjykatës së Krimeve të Rënda. Pas kësaj ai kërkoi opinionin e palëve në proces. I pranishëm në sallën e gjyqit ishte dhe i pandehuri Shkëlqim Miri, i cili refuzoi të flasë.
Avokati i ish-gjyqtarit të Apelit Shkëlqim Miri, Arben Prenga ishte dakord që trupi gjykues të mos ndryshonte pasi sipas tij, Miri për shkak se ka qënë gjyqtar, ka njohje me thuajse të gjithë gjyqtarët e vendit, dhe s’mund të shmangen gjyqtarët për shkak të njohjes me Mirin.
I ndodhur në këtë situatë, prokurori i çështjes Klodian Braho kërkoi të njihej me kërkesën e dorëheqjes, duke kërkuar njëherësh dhe 10 minuta pushim të seancës gjyqësore. Pasi u njoh me pretendimin e gjyqtarit Mustafai, prokurori Braho kërkoi përjashtimin nga ky gjykim të relatorit të çështjes Ardit Mustafai, duke cilësuar se ai ka konflikt interesi në gjykimin e kësaj dosjeje. Kërkesa e prokurorisë do të shqyrtohet nga një trupë gjyqësore tjetër, ku do vendoset përjashtimi ose jo i gjyqtarit Mustafaj. Seanca e rradhës është planifikuar në 24 korrik 2018.
Ish-gjyqtari i Apelit Shkëlqim Miri së bashku me kushëririn e tij Kujtim Miri, Alban Buci dhe Gentian Doda u arrestuan nga prokuroria për akuzën e korrupsionit pasiv dhe aktiv, pasi sipas prokurorisë kundrejt 30 mijë euro, ndërhynë për të lënë në fuqi në Gjykatë e Apelit Tiranë dënimin me 8 vite burg për Gentian Dodën, dënim i cili i solli lirinë të akuzuarit për vrasje në Burrel.
Hetimi i prokurorisë nisi pas informacioneve të marra se funksionarë të drejtësisë kanë favorizuar të pandehurin Gentian Doda i cili ishte dënuar në vitin 2012 me 20 vjet heqje lirie. Doda kishte marrë një ulje dënimi nga Gjykata e Matit dhe më pas trupa gjykuese e Apelit të Tiranës, pjesë e të cilës ishte edhe gjykatësi Miri, la në fuqi dënimin e ri me 8 vjet burg ndaj tij.
Në rast se gjendet fajtor ish gjyqtari rrezikon dënimin nga 3 deri në 10 vjet burg. Shkëlqim Miri, 46 vjeç ka një karrierë të gjatë në sistemin e drejtësisë, e cila starton në vitin 1999. Ai më parë kë qenë dhe anëtar i Këshillit të Lartë të Drejtësisë.
