Bisedimet maratonë të Maqedonisë midis liderëve kryesorë politikë, që synojnë të heqin bllokadën e opozitës për referendumin që do të mbahet në vend për marrëveshjen historike të emrit me Greqinë, mori një kthesë të papritur të hënën duke përfunduar në një fiasko.
Në fjalimin e tij publik pas bisedimeve të ditës së hënë, kryeministri maqedonas dhe lideri i Partisë Social Demokrate Zoran Zaev akuzoi kreun e opozitës VMRO DPMNE, Hristijan Mikovski, se po “gënjen” se ai dëshiron që vendi i tij t’i bashkohet NATO-s dhe BE-së dhe se po fshehë synimet e tij të vërteta në bisedime.
“Për fat të keq, Hristijan Mickovski nuk arriti ta kapte çastin. Në vend që të hipte në trenin që shkon drejt BE-së dhe NATO-s, ai zgjodhi të qëndronte në anën e errët të historisë,” tha Zaev.
Zaev e akuzoi Mickovskin se po shtiret se dëshiron të arrijë një marrëveshje që do të heqë bllokadën e partisë së tij për referendumin e ardhshëm, edhe pse partitë në pushtet i përmbushën të gjitha kërkesat e tij formale.
Ai pretendon se Mickovski po zvarritet në përpjekje për të negociuar një amnisti për “mentorin” e tij politik, duke iu referuar ish-liderit të VMRO DPMNE Nikola Gruevski, i cili aktualisht është në gjyq – bashkë me ish-anëtarë të tjerë të lidershipit të partisë së tij – për disa akuza të ngritura kundër tij nga Prokuroria Speciale, të përqendruara rreth përgjimeve të paligjshme të publikuara në vitin 2015.
Takimi maratonë i së të hënës midis liderëve të katër partive kryesore politike ishte përpjekja e tretë për një marrëveshje pasi dy takimet e mëparshme nuk arritën të jepnin rezultate javën e kaluar.
Mickovski më herët hodhi poshtë spekulimet se pengesa kryesore në bisedime ishte këmbëngulja e opozitës për ndryshimet në kodin penal me qëllim që të përfshihet një amnisti joformale për ish-udhëheqësit dhe zyrtarët e partisë.
Më herët gjatë ditës, dukej se bisedimet po shkonin drejt një marrëveshje kur të dyja palët i thanë mediave se qeveria kishte pranuar të gjitha kërkesat zyrtare të opozitës, përfshirë sigurimin e formimit të një qeverie teknike 100 ditë përpara zgjedhjeve të ardhshme, për të garantuar sigurinë e tyre.
Në shkëmbim, opozita, e cila kundërshton marrëveshjen greke, pritej të ndalonte bllokimin e emërimit të komisionit zgjedhor në parlament, i cili do të kishte për detyrë të organizonte referendumin dhe t’i bënte thirrje mbështetësve të tij të merrnin pjesë në votim.
Pjesëmarrja e opozitës është vendimtare për suksesin e referendumit. Pa të, shumë vëzhgues thonë se do të jetë shumë e vështirë të arrihet një prag votimi prej 50 për qind i të gjithë votuesve.
Një qëllim kryesor i marrëveshjes historike me Greqinë, nënshkruar më 17 qershor, ishte të sigurohej që Greqia të hiqte bllokadën e saj për anëtarësimin e Maqedonisë në NATO dhe BE.
Sipas marrëveshjes, Maqedonia ra dakord të ndryshojë emrin e saj në Republika e Maqedonisë së Veriut, ndërsa Greqia ra dakord të heqë veton për integrimin e Maqedonisë në BE dhe NATO.
Megjithatë, që marrëveshja të vihet plotësisht në zbatim, maqedonasit duhet të tregojnë se e mbështesin atë në një referendum.
Qeveria e drejtuar nga social demokratët dëshiron që votimi të mbahet në fund të shtatorit ose në fillim të tetorit në mënyrë që të ketë kohë për të miratuar ndryshimet e nevojshme kushtetuese deri në fund të vitit.
