Aktivistë dhe politikanë rumunë kërkuan dorëheqjen e ministrit të bujqësisë Petre Dea të enjten, pasi e krahasoi vrasjen dhe djegien e derrave të sëmurë me kampin nazist të përqendrimit në Aushvic.
Ditën e enjte politikanët rumunë të opozitës dhe grupe të shoqërisë civile kërkuan që ministri i bujqësisë Petre Daea të japë dorëheqjen një ditë pasi ai e krahasoi djegien e derrave të infektuar me gripin e derrit me kampin e përqendrimit të Aushvicit.
“Nuk ka antidot, nuk ka vaksinë, asnjë ilaç. E vetmja mënyrë është t’i sakrifikojmë ata. Derrat digjen. Kjo është një punë e tmerrshme. Atje brenda është si Aushvici,” tha ministri të martën në një emision televiziv.
Daea po fliste për një epidemi të dytë të gripit të derrit në Rumaninë juglindore, e cila e ka nxitur Bullgarinë të ndërjë një gardh në kufi.
Silviu Vexler, deputeti që përfaqëson komunitetin hebre në Rumani, i kërkoi Daeas të kërkojë një ndjesë publike.
“Pres që ministri Daea të kuptojë seriozitetin e kësaj deklarate dhe të kërkojë urgjentisht ndjesë publike për këtë gabim të papranueshëm,” shkroi ai në Facebook të enjten.
Drejtori i Qendrës për Monitorimin dhe Luftimin e Antisemitizmit në Rumani, Maximilian Katz, e ftoi Daean të vizitojë Aushvic-Birkenaun për “të kuptuar rëndësinë dhe seriozitetin e deklaratës së tij skandaloze”.
“Nuk është hera e parë që në Rumani bëhet ky lloj krahasimi, por është hera e parë që një ministër i përkohshëm ka bërë këtë lloj deklarate të papërshkrueshme,” tha Katz në një njoftim për shtyp të enjten.
Ambasada izraelite në Bukuresht tha se ishte “e befasuar dhe e zhgënjyer” nga deklarata e Daeas, sipas një njoftimi për shtyp të dërguar për mediat ditën e enjte.
Daea kërkoi ndjesë në një deklaratë për shtyp të publikuar nga Ministria e Bujqësisë të enjten, duke thënë se ai nuk kishte kurrsesi qëllim të ofendonte ndjeshmërinë hebraike.
“Unë deklaroj respektin tim për të gjithë anëtarët e komunitetit hebraik dhe theksoj se dëshiroja të paraqisja situatën e vështirë me të cilën po përballen fermerët e derrave për shkak të gripit të derrit,” tha ai.
“Nuk kam ofenduar kurrë njeri në jetën time. Unë i dua shokët e mi. Kam shprehur thjesht dhimbjen në shpirtin tim dhe shpresoj që të gjithë ta kuptojnë këtë!”, shtoi ai.
Megjithatë, të gjitha partitë e opozitës, përfshirë Liberalët, Bashkimin Shpëtoni Rumaninë dhe ish-lëvizja Rumania+ e deputetit Dacian Ciolos, e quajtën deklaratën e pafalshme dhe kërkuan dorëheqjen e tij të menjëhershme.
Ndërsa incidentet janë të rralla, Rumania ka një problem të vazhdueshëm të antisemitizmit që është i dukshëm në mediat sociale dhe faqet e internetit, por edhe në mungesën e ndërgjegjes publike dhe reagimeve ndaj fjalimit antisemit dhe mohimit të Holokaustit.
Liviu Rotman, profesor i historisë dhe drejtor i Qendrës së Studimeve Izraelite në Shkollën Kombëtare të Studimeve Politike dhe Administrative në Bukuresht, tha se referimi i Holokaustit në një kontekst të tillë ishte e pafalshme, por e quajti atë gjithashtu pasojë e mungesës së edukimit të Holokaustit.
“Natyrisht që unë po pres një dorëheqje,” tha ai në Facebook të enjten. “Unë po pres reagimin e shoqërisë civile, të akademikëve, të medias, të personaliteteve kulturore, sepse të tallesh me Hokokaustin është një rrezik serioz për shoqërinë rumune,” shtoi ai.
Çështja është sidomos e ndjeshme për shkak të numrit të madh të hebrenjve të vrarë në Rumaninë pro-naziste të kohës së Luftës së Dytë Botërore.
Ereth 280,000 dhe 380,000 hebrenj u zhdukën në Rumani dhe në territorin e pushtuar rumun midis viteve 1941-1944, thoshte një raport i publikuar nga qeveria rumune në vitin 2004. Shumica e të mbijetuarve u larguan pas luftës, duke rezultuar në një numër shumë të vogël prej vetëm 23,000 në vitin 1987.