Maqedonasit do të kenë mundësinë të japin mendimin e tyre për marrëveshjen historike “të emrit” me Greqinë fqinje më 30 shtator, vendosi të hënën parlamenti i vendit.
Gjashtëdhjetë e shtatë nga 120 deputetët në parlamentin e Maqedonisë votuan pro mbajtjes së referendumit mbi marrëveshjen e vendit me Greqinë më 30 shtator, i cili – nëse rezulton i suksesshëm – do të përshpejtojë integrimin euroatlantik të Maqedonisë.
Ndërkohë që deputetët nga partitë në pushtet dhe disa parti të opozitës e mbështetën fuqimisht referendumin, deputetët nga partia kryesore opozitare VMRO DPMNE munguan në seancë.
“E di që vendimi nuk është i lehtë. E di që kjo çështje është serioze dhe shpesh edhe e dhimbshme për të gjithë ne. Por BE-ja dhe NATO-ja janë e vetmja alternativë për prosperitetin e Maqedonisë,” tha deputeti Tomislav Tuntev, nga Partia kryesore Social Demokrate në pushtet, duke folur në emër të ligjvënësve që kishin dorëzuar nismën e referendumit.
Shumica parlamentare vendosi të vazhdojë me idenë e referendumit pasi të gjitha përpjekjet për ta përfshirë edhe opozitën në këtë gjë kishin dështuar. Opozitës iu kërkua gjithashtu t’i bëjë thirrje mbështetësve të saj të votojnë, edhe nëse ata janë kundër marrëveshjes së “emrit” me Greqinë.
Pjesëmarrja e opozitës mund të jetë shumë e rëndësishme për arritjen e pragut të kërkuar të pjesëmarrjes prej 50 për qind.
Partia VMRO DPMNE, e cila e konsideron marrëveshjen me Greqinë si një akt kapitulimi kombëtar, e kundërshtoi pyetjen e referendumit, e cila do të jetë: “A e mbështesni anëtarësimin e vendit në BE dhe NATO duke pranuar marrëveshjen midis Maqedonisë dhe Greqisë?”
Ajo e quajti pyetjen manipuluese dhe tha se në mënyrë që ajo ta mbështesë pjesëmarrjen në plebishit, marrëveshja “e emrit” me Greqinë nuk duhet të lidhet me ofertat e anëtarësimit të vendit në BE dhe NATO.
Një synim kryesor i marrëveshjes me Greqinë, e nënshkruar më 17 qershor, është të sigurojë që Greqia t’i japë fund bllokadës së saj të gjatë të anëtarësimit të Maqedonisë në NATO dhe BE.
Sipas marrëveshjes, Maqedonia pranoi ta ndryshojë emrin e saj në Republika e Maqedonisë së Veriut, ndërsa Greqia ra dakord të heqë veton për integrimin e Maqedonisë në BE dhe NATO.
Megjithatë, që marrëveshja të vihet plotësisht në zbatim, maqedonasit duhet të tregojnë se e mbështesin atë në një referendum.
