Mes raportimeve të ethshme për ndarjen e mundshme të Kosovës ose që serbët e Kosovës mund të shpallin autonominë e tyre, presidenti Thaçi të premten këmbënguli se ndarja dhe “shkëmbimi i territoreve” nuk ishin në axhendë.
Presidenti i Kosovës Hashim Thaçi të premten doli për të zbutur spekulimet për një ndarje etnike të vendit, duke thënë se ai po punonte vetëm në përfshirjen eventuale të pjesëve etnike shqiptare të Serbisë në Kosovë.
“Nuk do të ketë ndarje, autonomi apo shkëmbim territoresh. Unë po punoj vetëm që Presheva, Medvegja dhe Bujanoci në Serbi t’i bashkohen Kosovës,”, tha Thaçi.
Sipas tij, Beogradi do ta kishte shumë vështirë ta realizonte këtë, por ai do ta vendoste çështjen në tryezë.
Thaçi tha se ai gjithashtu e shihte si pozitiv debatin e fundit mbi këtë temë, “pavarësisht keqinterpretimeve dhe keqkuptimeve të qëllimshme apo jo.”
“Ne së bashku do të gjejmë një zgjidhje në fund të këtij procesi. Parlamenti do të ketë fjalën e fundit,” shtoi ai.
Thaçi tha gjithashtu se ishte koha që qytetarët e Kosovës të kishin “një zë më të fortë” në diskutimet me Serbinë, duke lejuar të drejtën e tyre për të mbajtur një referendum.
“Unë po kryej bisedimet e nevojshme që në të ardhmen e afërt do të bëjnë të mundur që zëri i qytetarëve të mundësohet nëpërmjet një referendumi, veçanërisht në marrëveshje të tilla që unë i konsideroj të rëndësishme që qytetarët të shprehin vullnetin e tyre,” shtoi ai.
Ndërkohë, kryeministri Ramush Haradinaj thirri një mbledhje të jashtëzakonshme të Këshillit të Sigurisë Kombëtare, ku paralajmëroi se autoritetet e Kosovës do të reagonin ndaj cilitdo që vepronte kundër ligjit.
“Kushdo që kryen veprime që shkelin ligjet e Kosovës dhe marrëveshjet ndërkombëtare do të marrë një përgjigje nga autoritetet e sundimit të ligjit,” tha Haradinaj.
Kushdo që hyn në Kosovë me qëllim të shkaktojë incidente do të trajtohet gjithashtu. “Nëse ndodh ndonjë gjë, ne jemi në një gjendje gatishmërie për të vepruar,” tha Haradinaj.
Një klerik ortodoks serb në Kosovë, abati Sava Janjiç, paralajmëroi për rrezikun e dhunës “të organizuar” në Kosovë më 31 korrik.
Abati i manastirit të famshëm të Visoki Deçanit postoi në rrjetet sociale se “informacione shumë shqetësuese po qarkullojnë në Kosovë, mes tyre lajme për një skenar të afërt të një incidenti të ndërsjellë në veri të Kosovës, i cili do të shkaktonte reagime në të dyja anët dhe do ta fuste Kosovën në një skenar ndarjeje”.
Në Serbi, presidenti Aleksandër Vuçiç thirri një mbledhje urgjente të Këshillit të Sigurisë Kombëtare për të shtunën në mëngjes.
Gazeta serbe Kurir njoftoi se takimi ishte thirrur për shkak të “situatës në Kosovë” dhe për shkak të një plani të dyshuar të shqiptarëve të Kosovës për të marrë liqenin e Gazivodës veriore të drejtuar nga serbët.
Të mërkurën, BIRN Kosova raportoi se Policia e Kosovës kishte urdhëruar stafin e saj me uniformë të pezullonte të gjitha planet e tyre të pushimeve verore, duke cituar detyra operacionale.
Në një letër drejtuar stafit, drejtori i departamentit për operacionet, Rashit Qalaj, tha se vendimi mbetej i vlefshëm deri në një njoftim të mëtejshëm.
Mes shqetësimeve rreth tensioneve të fundit, Ilir Deda, një deputet nga Alternativa e opozitës, kërkoi dorëheqjen e presidentit Thaçi në një letër të hapur të botuar të premten.
Deda tha se deklaratat e mëparshme të Thaçit kishin nënkuptuar ndarjen e Kosovës dhe akte të tilla ishin anti-shtetërore.
“Ju bëj thirrje që të tërhiqeni nga një aventurë e tillë politike dhe të jepni dorëheqjen. Dorëheqja juaj do ta shpëtonte Kosovën nga shkatërrimi dhe do t’ju mundësonte të jetonit në Kosovë si ish-udhëheqës dhe qytetar i cili ka pranuar gabimet e tij dhe është penduar për to,” shkroi Deda në Facebook.
“Pranimi i një gabimi është akt fisnikërie, ndërsa vënia në zbatim e planeve të shpërbërjes së Kosovës është një krim dhe tradhti,” shtoi ai.
Deda paralajmëroi se nëse presidenti nuk do të jepte dorëheqjen, “Kuvendi i Kosovës nuk ka rrugë tjetër përveçse të fillojë procedurën e shkarkimit tuaj si president i Kosovës për shkak të rrezikut të integritetit territorial të Kosovës dhe rendit kushtetues”.
