Grupe të djathta të udhëhequra nga partia e vogël pro-ruse Maqedonia e Bashkuar kanë nisur një fushatë të përbashkët për bojkotimin e referendumit të 30 shtatorit për ndryshimin e emrit të vendit në mënyrë që të ndreqen marrëdhëniet me Greqinë.
Një koalicion i 28 partive politike të vogla të djathta, fraksione politike, shoqata civile dhe OJQ-sh po mbështesin një fushatë të quajtur “Maqedonia bojkoton”, qëllimi i së cilave është të zmbraps referendumin e shtatorit mbi marrëveshjen historike të emrit me Greqinë, që është e rëndësishme për rrugën Euro-Atlantike të Maqedonisë.
Janko Bacev, kryetari i partisë së vogël Maqedonia e Bashkuar dhe kreu i të ashtuquajturës selia e krizës, të cilën grupet e krahut të djathtë e formuan të dielën, e quajti qeverinë e udhëhequr nga social demokratët të jashtëligjshme dhe i përshkroi ata që mbështesin referendumin si tradhtarë.
“Një qeveri e re dhe ligjore,që do të vijë në pushtet, do të merret me të gjithë tradhtarët kombëtarë,” paralajmëroi Bacev të dielën.
“Le të bojkotojmë referendumin e 30 shtatorit dhe të shpëtojmë emrin shekullor të Maqedonisë,” tha ai.
Referendumi më 30 shtator do t’i pyesë votuesit nëse ata mbështesin pranimin e Maqedonisë në NATO dhe BE duke pranuar marrëveshjen e emrit me Greqinë, e cila u nënshkrua në qershor.
Sipas marrëveshjes, Maqedonia ra dakord të ndryshojë emrin e saj në Republika e Maqedonisë së Veriut, ndërsa Greqia ra dakord të heqë veton e saj mbi integrimin e Maqedonisë në NATO dhe BE.
Që marrëveshja të zbatohet plotësisht, maqedonasit duhet të tregojnë se e mbështesin atë në referendum.
Maqedonia e Bashkuar, e udhëhequr nga Becev, është e vetmja parti e hapur pro-ruse në vend dhe nuk ka deputetë në parlament.
Ndër personat e përfshirë në fushatën “Maqedoni bojkoton” është gjithashtu edhe Filip Petrovski, një ish-anëtar i shquar i partisë kryesore të opozitës VMRO DPMNE, që tani po udhëheq grupin e ashtuquajtur “Fraksioni demokratik” të partisë.
Petrovski të dielën akuzoi qeverinë e Zoran Zaev se po përpiqet të bindë VMRO DPMNE të marrë pjesë në referendum në mënyrë që të rrisë mundësitë për të arritur pragun e kërkuar prej më shumë se 50 për qind të votuesve.
“Ne këtu themi jo! S’do ta pranojmë atë lojë. Ne do të bojkotojmë. Referendumi duhet të dështojë dhe më 30 shtator, qeveria e Zaevit do të shkatërrohet gjithashtu,” tha Petrovski.
Zyrtarisht, VMRO DPMNE mbetet e pavendosur nëse do të marrë pjesë në referendum. Partia e kundërshton fuqishëm marrëveshjen e “emrit” me Greqinë.
Fushata e sapoformuar kundër referendumit përfshin edhe të ashtuquajturat “shoqata patriotike”, si Vëllazëria e Krishterë, Amanet 1903, Tvrdokorni, Makedonium dhe Partia e Tretë e Maqedonasve, si dhe disa shoqata të tjera më pak të njohura ose krejtësisht të panjohura.
