Elez Blakaj, prokurori i Kosovës i cili hetoi listën kontroverse të veteranëve të luftës, tha të hënën se ishte përballur me kërcënime të vazhdueshme mbi punët që kishte bërë për këtë çështje.
Prokurori special i Kosovës, i angazhuar me hetimin e abuzimit të listës së veteranëve të luftës, publikoi të hënën një deklaratë të gjatë ku pretendoi se kishte qenë nën kërcënime të vazhdueshme gjatë punës së tij nga “njerëz të njohur dhe të panjohur” për të mos hetuar.
Regjistrimi si veteran i Ushtrisë Çlirimtare të Kosovës, UÇK siguron përfitime monetare.
Elez Blakaj, i cili dha dorëheqjen më 15 gusht, gjithashtu kujtoi takime të nxehta me kryeprokurorin Aleksandër Lumezi kur po hetonte listën, të cilën shumë besojnë se është e fryrë.
“Lumezi… kërkoi të dinte përse kisha ftuar [kryetarin e kuvendit] Kadri Veselin [si dëshmitar] në çështjen e veteranëve, duke pohuar se”nuk ka nevojë të marrësh në pyetje ata që kanë imunitet parlamentar”.
“Ia bëra të qartë se Gjykata Kushtetuese… nuk i jep imunitet askujt nga akuzat kriminale,” shkroi Blakaj.
Lumezi, megjithatë, i tha BIRN se nuk kishte arsye që Blakaj të merrte Veselin në pyetje.
“E ftova atë [Blakajn] në zyrën time pasi mora vesh se thirri Veselin si dëshmitar dhe i kërkova të më shpjegonte arsyen. Blakaj tha se e kishte ftuar Veselin si dëshmitar bazuar në atë që kishte thënë Veseli në seancën e kuvendit. I thashë se deputetët nuk mund të ftohen për të dëshmuar në bazë të asaj që ata thonë në parlament… sepse ata kanë imunitet ndaj asaj që thonë në kuvend.”
Blakaj tha gjithashtu se Lumezi ishte “përpjekur ta trembte” për një aktakuzë të lëshuar kundër zyrtarëve të lartë në Partinë Demokratike të Kosovës, PDK, në qeveri, lidhur me një skandal përgjimi, duke i kërkuar që ta rishikonte aktakuzën ose “të përballej me komision disiplinor”.
Në gusht të vitit 2016, portali Insajderi.com në Kosovë filloi të publikojë bisedat midis zyrtarëve të lartë të PDK-së ku sugjerohej se PDK-ja ka ndikuar në emërime në pozita të larta në qeveri, drejtësi, polici dhe media.
Lumezi tha për BIRN se nuk ishte dakord me aktakuzën dhe se “ka prova kundër disa të pandehurve, por jo kundër të gjithëve”.
Reuters raportoi në prill se prokuroria e Kosovës ngriti akuza kundër 11 personave, shumica e të cilëve zyrtarë të PDK-së – duke përfshirë ministrin për inovacion dhe sipërmarrje, Besim Beqaj – për dyshime patronazhimi politik mbi vendet e punës në sektorin publik.
“Pavarësisht nga dëshira ime personale për të adresuar problemet brenda sistemit, ishte e pamundur për mua, ashtu si është thuaje e pamundur për gati çdo prokuror apo zyrtar në sistemin e prokurorisë të shqyrtojë këto ose shkelje të tjera,” tha Blakaj.
Deklarata e Blakajt erdhi disa orë pasi kreu i Prokurorisë Speciale, Reshat Millaku, tha se prokuroria do të vazhdojë të hetojë listën e veteranëve, pavarësisht nga dorëheqja e Blakajt.
Millaku shpjegoi se kjo ndodhte për shkak se kishte të bënte me një “akuzë penale, e cila ka dëmtuar buxhetin e Kosovës në periudhën e pasluftës”.
Mediat raportuan se drafti i aktakuzës që Blakaj kishte përgatitur përfshinte të gjithë Komisionin e Qeverisë për Verifikimin e Veteranëve të Luftës, përfshirë këtu ish-shefat e UÇK-së, të cilët ishin përgjegjës për identifikimin e veteranëve.
Sidoqoftë, Millaku këmbënguli se dokumenti i dorëzuar nga Blakaj kishte mangësi teknike, përfshirë 19,060 emra veteranësh të rremë.
Ai tha se çështja do të transferohet te një prokuror tjetër, duke hedhur poshtë pretendimet se ai po vepronte nën presion politik.
Dorëheqja e Blakajt ka shkaktuar debat në Kosovë. Blakaj tani është në SHBA, në kërkim të mundësive të tjera për karrierë.
“Disa e kanë shpallur një hero, të tjerë një frikacak. Ai nuk është asnjë prej këtyre. Ishte një prokuror shumë i mirë, ndaj i dhashë atij këtë çështje,” tha Millaku.
Kryeprokurori Lumezi tha më 16 gusht se rreth 19,000 veteranë të luftës marrin pa i merituar përfitimet qeveritare.
Prokuroria e shtetit njoftoi se kishte filluar mbledhjen e informacionit rreth gabimeve të mundshme në procesin e verifikimit të ish guerilëve të UÇK-së në vitin 2016.
“Ky hetim… është i drejtuar ndaj atyre individëve që kanë kryer shkelje duke dhënë dëshmi të rreme, ose duke paraqitur dokumente fiktive për të fituar statusin e veteranit të luftës”, tha prokuroria në atë kohë.
Njoftimi erdhi pasi qeveria e atëhershme botoi një raport ku numëronte 46,230 individë si pjesë e forcës guerile në konfliktin 1998-99 me forcat serbe.
OJQ-të dhe organizatat e veteranëve të luftës në Prishtinë ngritën shqetësime se kjo shifër ishte fryrë për arsye politike.
Ish-anëtarë të lartë të UÇK-së vazhdojnë të dominojnë politikën në Kosovë. Shumë prej tyre u bënë politikanë pas luftës së viteve 1998-99, përfshirë presidentin aktual Hashim Thaçi dhe kryeministrin Ramush Haradinaj.
Lexoni më shumë: