Komisioneri për Zgjerimin në BE iu shmang pyetjes nëse Brukseli do të pranonte një shkëmbim të mundshëm territori mes Kosovës dhe Serbisë, ndërsa e vuri theksin te stabiliteti. Komenteve iu shmang edhe kryeministri Rama.
Komisioneri për Zgjerimin në Bashkimit Europian, Johannes Hahn iu shmang pyetjes nëse Brukseli do të mbështeste një shkëmbim të mundshëm territori mes Kosovës dhe Serbisë, ndërkohë që theksoi se çdo marrëveshje mes dy vendeve “nuk duhet të rrezikojë stabilitetin e përgjithshëm të Ballkanit”.
I pranishëm në takimin mes kryeministrave të Shqipërisë, Kosovës dhe Malit të Zi në Durrës, Hahn përsëriti parimet e vendosura nga Brukseli për vendet e Ballkanit Perëndimor, të cilat përfshijnë edhe negociatat mes dy vendeve.
“Nuk është e përshtatshme në këtë fazë të bëjmë komente mbi diskutimet dhe negociatat në vazhdim. Unë mund të them se ne s'do të pranojmë asnjë anëtar të ri nëse nuk janë zgjidhur mosmarrëveshjet dypalëshe dhe ajo që ka vlerë për ne është stabiliteti në rajon,” tha Hahn.
“Çdo lloj marrëveshjeje nuk duhet të rrezikojë stabilitetin e përgjithshëm të rajonit…,” shtoi ai.
Kryeministri i Shqipërisë, Edi Rama, i kritikuar më herët për distancën e mbajtur nga debati mbi një ndarje të mundshme të Kosovës, iu shmang sërish komenteve.
“Keni edhe në nënshkrimin tim në fjalën që sapo tha komisioneri,” ia preu shkurt Rama.
Diskutimi mbi ndryshimin e mundshëm të kufinjve si pjesë e një marrëveshjeje mes Kosovës dhe Serbisë mori hov pasi ambasadori i Shteteve të Bashkuara në Prishtinë ngurroi ta përjashtonte si mundësi, gjatë një interviste. Më pas, presidenti serb Aleksandër Vuçiç dhe ai kosovar, Hashim Thaçi kanë folur në vazhdim mbi mundësinë e shkëmbimit të territorit, ndonëse secili prej tyre ka qëndrime të ndryshme mbi “ndarjen”.
Një ndryshim i mundshëm i kufijve në Ballkan është kundërshtuar ashpër nga kancelarja gjermane, Angela Merkel, ndërkohë që Uashingtoni dhe së fundmi Brukseli kanë dhënë sinjale se mund ta konsiderojnë një marrëveshje të tillë.