Veteranët e luftës ofruan mbështetjen e tyre pasi përfaqësuesit politik të shqiptarëve etnikë të Luginës së Preshevës i kërkuan Parlamentit të Kosovës të mbështesë kërkesën e tyre që kjo zonë të bëhet pjesë e Kosovës.
Kreu i Organizatës së Veteranëve të Luftës të Ushtrisë Çlirimtare të Kosovës, Hysni Gucati, tha të martën për agjencinë e lajmeve Kosova Press se ish-guerrilasit e UÇK-së janë dakord që zona e Luginës së Preshevës me shumicë shqiptare duhet të bëhet pjesë e Kosovës, por se ata kundërshtojnë dhënien e çdo toke Serbisë në këmbim të kësaj.
“Ne jemi që Presheva, Medvegja dhe Bujanovci t’i bashkohen Kosovës, por nuk jemi që t’i jepet territor askujt,” tha Gucati.
Presidenti i Kosovës Hashim Thaçi ka sugjeruar idenë e asaj që ai e quajti një “korrigjim kufitar” në negociatat me Serbinë dhe ka propozuar që në tryezën negociuese të paraqesë kërkesën e shqiptarëve etnikë në Luginën e Preshevës në Serbinë jugore për t’iu bashkuar Kosovës.
Megjithatë, Gucati tha se veteranët e UÇK-së nuk janë të sigurt se çfarë do të thotë “korrigjimi i kufijve”.
“Ne jemi shumë të interesuar për një korrigjim, por cila pjesë duhet të korrigjohet?” pyeti Gucati.
Pas deklaratës së Thaçit se ai do të këmbëngulë që çështja e luginës së Preshevës të ngrihet në Bruksel gjatë negociatave me Serbinë, përfaqësuesit etnik shqiptarë nga rajoni u takuan të hënën në Prishtinë.
Pas takimit, ata kërkuan që partitë politike në Kosovë të miratojnë një rezolutë që mbështet kërkesën e tyre për t’u bërë pjesë e Kosovës.
Por Ilir Deda, një deputet nga partia opozitare Alternativa, tha se nuk kishte “asnjë kërkesë rezolute nga Lugina e Preshevës për t’u bashkuar me Kosovën” dhe e akuzoi Thaçin se po përdor shqiptarët e Serbisë për qëllimet e veta.
Ai tha gjithashtu se shqiptarët nga Lugina e Preshevës nuk duhet të përfshihen në betejën aktuale politike në Kosovë për negociatat me Serbinë “sepse nuk do të fitojnë asgjë nga ajo”.
Isa Mustafa, lideri i Lidhjes Demokratike të Kosovës, LDK, tha pas takimit me delegacionin e përfaqësuesve shqiptarë nga Lugina e Preshevës se ideja e korrigjimit të kufirit ishte e rrezikshme për Kosovën.
“Korrigjimi i kufirit në një kohë kur Serbia nuk i njeh kufijtë aktualë të Kosovës dhe hapja e çështjes së integritetit territorial nuk janë vetëm në konflikt me kushtetutën e Kosovës dhe shpalljen e pavarësisë, por gjithashtu rrezikojnë të vënë në tryezën e diskutimit shtetësinë e Kosovës,” tha Mustafa.
Kreu i grupit parlamentar të LDK-së, Avdullah Hoti, tha se partia nuk do të votojë për një rezolutë që shkel kushtetutën.
“Me gjithë respektin e duhur për shqiptarët e Luginës së Preshevës, një rezolutë e tillë është antikushtetuese. Prandaj ne nuk do ta votojmë atë, vetëm në rast se ekziston një vullnet për të ndryshuar kushtetutën,” tha Hoti.
Pika 3 e nenit 1 të Kushtetutës së Kosovës thotë se “Republika e Kosovës nuk do të ketë pretendime territoriale dhe nuk do të kërkojë asnjë bashkim me ndonjë shtet apo pjesë të ndonjë shteti”.
