Një numër eurodeputetësh bullgarë, rumunë dhe kroatë mbështetën Hungarinë në mocionin e Parlamentit Europian duke dënuar shkeljet e perceptuara të vlerave thelbësore të BE-së.
Eurodeputetët bullgarë, kroatë dhe rumunë të Parlamentit Europian nga grupe të ndryshme ishin ndër mbrojtësit e Hungarisë dhe liderit të saj, Victor Orban, në votimin për të filluar procesin e Nenit 7 që mund të heqë të drejtën e Hungarisë për të votuar mbi vendimet e BE-së.
Votimi mbi vazhdimin apo jo më tej të asaj që quhet “opsioni bërthamor”, i cili mund të bëjë që Hungaria të humbasë të drejtën e saj të fjalës në Këshillin e Europës, u zhvillua në Parlamentin Europian në Strasburg të mërkurën.
Mocioni u miratua me shumicën e kërkuar prej dy të tretave të 448 deputetëve, duke mbështetur deklaratën se Hungaria “rrezikon qartë të shkelë rëndë” vlerat thelbësore të BE-së, përfshirë pavarësinë gjyqësore, lirinë akademike dhe lirinë e fjalës.
Megjithatë, votimi gjithashtu zbuloi përçarje të mëdha, pasi 197 deputetë votuan kundër mocionit dhe 48 të tjerë abstenuan.
“E di që ju e keni ndarë mendjen,” u tha Orban një ditë më parë eurodeputetëve, duke shtuar se ai e dinte “se fjalimi im këtu sot nuk do të arrijë të ndryshojë mendimin tuaj”.
Një përzierje e deputetëve liberalë, konservatorë dhe të qendrës së djathtë nga tre vendet e Ballkanit ishin midis mbrojtësve të Orbanit.
Tetë deputetë bullgarë, duke përfshirë pesë nga Partia Popullore Europiane, PPE, një nga Socialistët dhe Demokratët, S & D, dhe dy nga grupi i Konservatorëve dhe Reformatorëve, ECR, kundërshtuan mocionin.
Këta përfshinin Andrey Kovachev dhe Emil Radev, Momchil Nekov nga socialistët dhe dy nacionalistët, Nikolai Barekov dhe Angel Dzhambazki.
Pesë të tjerë, nga fraksioni Liberal dhe PPE votuan për sanksione; tre abstenuan ose nuk u paraqitën.
Eurodeputeti Angel Dzhambazki, i cili u bashkua me Orbanin, shkroi në Facebook duke dënuar mocionin dhe duke shtuar se “sot Bashkimi Europian shkoi në drejtimin e homologut të tij sovjetik”.
Kryeministri hungarez gjithashtu gjeti aleatë mes politikanëve të Rumanisë.
Eurodeputetët Renate Weber dhe Norica Nicolai, anëtarë të Aleancës së Liberalëve dhe Demokratëve të Rumanisë, ALDE, aleati i vogël i koalicionit qeverisës, votuan kundër vënies në zbatim të Nenit 7 në rastin e Hungarisë.
Si Weber ashtu edhe Nicolai kanë marrë qëndrime anti-perëndimore në të kaluarën. Weber tha për mediat javën e kaluar se ishte sistemi amerikan i mbrojtjes nga raketat në Deveselu, në Rumaninë jugore, që kishte “trazuar rusët”.
Më 17 gusht, ai tha se pamjet e policisë rumune të trazirave ndërsa godisnin protestuesit në protestën anti-qeveritare më 10 gusht ishin të rreme.
Eurodeputeti liberal liberal Radu Ungureanu, si dhe deputetët e pakicave hungareze Iuliu Winkler dhe Csaba Sogor gjithashtu votuan kundër masës.
Eurodeputeti liberal dhe ish-kryeministri rumun Theodor Stolojan dhe deputetja e pavarur Ramona Manesku abstenuan.
Nga Kroacia, katër eurodeputete të EPP, Ivana Maletiç, Dubravka Suica, Zeljana Zovko dhe Marijana Petir, plus një konservator, Ruza Tomasic, votuan kundër zbatimit të Nenit 7.
“Delegacioni ynë i vogël votoi kundër raportit. Hungaria është një vend fqinj me të cilin duam të ndërtojmë marrëdhënie të mira fqinjësore. Çështja tani është në duart e Parlamentit Europian dhe është hera e parë që ky i fundit përballet me këtë temë; herën e fundit, kur bëhej fjalë për Poloninë, procedura u nis nga KE-ja,” tha Suica për TV N1.
Pesë nga 11 eurodeputetët e Kroacisë i përkasin PPE-së – Suica, Ivana Maletiç, Zeljana Zovko, Ivica Toliç, Marijana Petir. Dy janë socialdemokratë, Biljana Borzan dhe Tonino Picula dhe dy i përkasin Grupit Liberal ALDE, Ivan Jakovciç dhe Jozo Rados. Ruza Tomasic, i përket Grupit Konservator dhe Davor Skrlec i përket Grupit të të Gjelbërve/Aleanca e Lirë Europiane.
