Protestues demonstruan jashtë Pallatit të Drejtësisë në Sofje kundër arrestimit të dy gazetarëve të cilët u ndaluan javën e kaluar në Bullgari ndërsa investigonin mashtrimin e dyshuar në lidhje me fondet e BE-së.
Rreth 200 vetë protestuan jashtë Pallatit të Drejtësisë në qendër të Sofjes të hënën në mbrëmje kundër arrestimeve javën e kaluar të gazetarëve investigativë rumunë dhe bullgarë që po punonin për një lajm mbi abuzim me fondet e BE-së.
Më 13 shtator, Attila Biro nga platforma investigative rumune Rise Project dhe kolegu i tij bullgar Dimitar Stoyanov nga faqja e lajmeve Bivol u ndaluan nga policia lokale pranë Pernikut, në jug të Sofjes, duke shkaktuar një protestë në të dy vendet e tyre si dhe jashtë vendit.
Ata u kapën ndërsa përpiqeshin të filmonin subjektet e investigimit të tyre teksa digjnin dokumente në lidhje me keqpërdorimin e fondeve të BE-së nga firma konsulence të lidhura me Grupin GP bullgar, një firmë ndërtimi.
Të dy gazetarët dhe një person i tretë që i shoqëronte u prangosën dhe u dërguan në rajonin e policisë lokale, duke mos pasur kontakte me redaktorët e tyre deri në orët e para të ditës së premte dhe u liruan vetëm pas ndërhyrjes së stafit konsullor rumun.
Policia bullgare mohoi çdo keqbërje dhe kreu i Drejtorisë së Përgjithshme të Luftës Kundër Krimit të Organizuar, Ivaylo Spiridonov, tha për bTV se oficerët që arrestuan reporterët ishin aktualisht në vendin e ngjarjes për të kapur njerëzit që dyshohet se po shkatërronin dokumentet.
“Çfarë kërkonin këta gazetarë në skenën e krimit?” pyeti Spiridonov.
Ndërkohë, Agjencia Bullgare e Sigurisë Kombëtare, DANS, dhe prokuroria shtetërore kanë nisur hetime bazuar në pretendimet që po investigoheshin nga Bivol dhe Rise Project që fondet europiane po keqpërdoreshin, njoftoi prokuroria të hënën.
Investigimi u nis pasi Bivol, zv/kryeministri Tomislav Doncev dhe gjykata e qytetit të Sofjes njoftuan zyrtarisht gjykimin e dyshimeve se GP Group ishte i përfshirë në keqpërdorimin e dyshuar të fondeve.
Në një deklaratë për mediat të premten e kaluar, GP Group hodhi poshtë të gjitha akuzat, duke thënë se asnjë dokumentacion që i përket kompanisë nuk është marrë, djegur apo groposur ndonjëherë.
