Ligjvënësi amerikan Christopher Coons paraqiti një rezolutë në Senat duke i bërë thirrje Rusisë të urdhërojë trupat e saj të largohen nga rajoni i shkëputur i Transnistrisë në Moldavi.
Senatori Christopher Coons të martën paraqiti një projektrezolutë në Senatin e SHBA-së duke i bërë thirrje Rusisë të përmbushë angazhimet e bëra në një samit të OSBE-së në vitin 1999 dhe të tërheqë ushtarët e saj nga rajoni i shkëputur i Transnistrisë në Moldavi.
Rezoluta i kërkon Rusisë “të tërheqë forcat e saj ushtarake dhe municionet nga brenda territorit të njohur ndërkombëtarisht të Moldavisë”.
Ajo gjithashtu i bën thirrje Moskës që “të përmbahet nga lëshimi i kërcënimeve ekonomike ose ushtrimi i presionit ndaj Moldavisë dhe të heqë dorë nga të gjitha veprimet që mbështesin lëvizjet separatiste brenda territorit të Moldavisë”.
Rusia ende mban rreth 1,500 trupa të ish-Ushtrisë së 14-të Sovjetike, tani e quajtur Grupi Operativ i Trupave Ruse, OGRT, në të ashtuquajturën Republika Moldave Pridnestroviane, më mirë e njohur si Transnistria.
Qeveria moldave ka lobuar aktivisht për më shumë se një vit në Europë dhe SHBA për të rritur ndërgjegjësimin për atë që thotë se pasja e trupave të huaja në tokën e saj është rrezik për sigurinë e saj kombëtare dhe për rajonin më të gjerë.
Ndërkohë, presidenti pro-rus i Moldavisë, Igor Dodon, tha për televizionin publik të vendit të martën se ai dëshiron të mbajë një referendum për riintegrimin e rajonit të shkëputur në Moldavi.
“Pas zgjedhjeve parlamentare, do të diskutojmë skenarë konkretë mbi mënyrën si mund të ndodhë ky riintegrim,” tha Dodon.
“Çdo formë riintegrimi ose bashkëjetesëse do të diskutohet me të gjithë qytetarët e Moldavisë në një referendum,” shtoi ai.
Megjithatë, liderët separatistë në Tiraspol duan që pavarësia e Transnistrisë nga Moldavia të njihet dhe kanë shprehur shpresë për t’u bashkuar me Federatën Ruse.
Deklarata përfundimtare në Samitin e NATO-s në Bruksel në korrik gjithashtu i kërkoi Rusisë të tërhiqte trupat nga Moldavia, si dhe nga Gjeorgjia dhe Ukraina.
Moldavia ka shprehur gjatë se Rusia inkurajoi dhe nuk pengoi luftimet në vend në vitet 1990 dhe këmbëngul se ushtarët dhe mercenarët rusë dhe ukrainas luftuan në anën e Transnistrisë kundër Moldavisë.
Në vitin 1999, në një takim të OSBE-së në Stamboll, Rusia bëri një angazhim për të urdhëruar trupat e saj të lënë rajonin e shkëputur, por ende nuk e ka bërë këtë.
Moska gjithashtu ka 400 paqeruajtës në Transnistri, gjoja për të siguruar një armëpushim 26-vjeçar që i dha fund konfliktit të përgjakshëm midis Moldavisë dhe rajonit të saj separatist.