Duke përcjellë përmes muzikës mesazhin e mbrojtjes së natyrës dhe lumenjve, një grup muzikantësh shqiptarë publikuan një këngë “të gjelbër”, që i këndon bukurive të Vjosës dhe Valbonës dhe kërcënimit nga lakmia njerëzore.
Një grup muzikantësh shqiptarë publikuan të mërkurën një këngë të titulluar “Lum Lumi i Lirë”, në të cilën bashkojnë zërin në mbrojtje të lumenjve të rrezikuar nga digat dhe qindra lejet e dhëna në dy dekadat e fundit për ndërtime hidrocentralesh në vend.
Kënga “e gjelbër” është një bashkëpunim i artistëve Elina Duni, Eda Zari, Linda Rukaj, Rhani Krija, Vlashent Sata, Emiljano Dhimo, Shpat Deda, Gert Kapo, Henning Jung, Kleidi Eski, Sokol Çunga dhe Mikaela Minga.
“Kjo këngë (një nismë e duos Duni – Zari) lindi si nevojë për përhapjen e informacionit mbi padrejtësitë sistematike që po u bëhen lumenjve, natyrës, si dhe për të mbështetur zërin protestues të banorëve pranë zonave të këtyre lumenjve,” shpjeguan artistët në këngën e publikuar në YouTube.
“Njëkohësisht, kënga vlen për të fuqizuar ndërgjegjësimin e çështjes në mbarë shoqërinë tonë,” shtuan ata.
Duke e parë muzikën, jo vetëm një formë argëtimit, por edhe si një mjet të ndërgjegjësimit, artistët thonë se shpresojnë që kënga të solidarizojë dhe frymëzojë njerëzit të mbrojnë natyrën.
Përmes një teksti që i flet lumit të Valbonës dhe atij të Vjosës, muzikantët japin alarmin për “të keqen e pakthyeshme” që po ndodh me këto lumenj, por edhe më gjerësisht për shfrytëzimin pa kriter të natyrës shqiptare dhe më gjerë të asaj botërore nga njerëzimi.
O Valbonë me Shtojzovalle,
që këndon tek zbret ndër male,
ujin duan të ta shterin,
shtratin duan të ta bjerrin.O moj Vjosë valë-valë,
zonjë e rëndë, ti zonjë e rrallë,
vrullin duan të ta presin,
trupin duan të ta shesin.
Kjo nuk është hera e parë që artistët solidarizohen me protestat mjedisore në vend.
Për dy vite me radhë artistët kanë organizuar koncert-protesta në Valbonë, Vjosë dhe Theth, ku përmes këndimit për bukuritë natyrore shqiptare kanë nxitur gjithashtu qeverinë të tërhiqet nga planet për ndërtimin e hidrocentraleve në Parkun Kombëtar të Valbonës dhe në lumin e fundit të egër në Europë, Vjosën.
526 leje për hidrocentrale janë dhënë në dekadën e fundit nga qeveritë e djathta dhe majta në Shqipëri.
Lexoni të ngjashme:
- Të pushtuar prej HEC-eve: Banorët e Kukësit kundërshtojnë ndërtimet
- Vendimi i gjykatës shton rezistencën e banorëve kundër HEC-eve në Valbonë
Banorët e zonave të prekura dhe ekspertët mjedisorë kanë protestuar vazhdimisht në vitet e fundit kundër hidrocentraleve, duke e akuzuar pushtetin se po favorizon një grup biznesmenësh ndërkohë që i heq banorëve mjetet e jetesës. Qytetarët gjithashtu kanë denoncuar faktin se lejet janë dhënë pa konsultim publik me ta ose përmes falsifikimit të firmave duke përfshirë persona të vdekur.
Mjedisorët në vend nga ana tjetër i kanë kundërshtuar hidrocentralet si një formë e qëndrueshme apo e gjelbër e përfitimit të energjisë dhe e kanë nxitur qeverinë të shkojë drejt formave të prodhimit që janë miqësore me natyrën dhe njerëzit.
Lexoni të ngjashme:
