Avokatja Donata Lepenica dhe dy persona të tjerë u arrestuan me urdhër të Gjykatës së Krimeve të Rënda të enjten për “korrupsion aktiv”. Nën hetim edhe prokurori Përparim Hasa.
Policia e Tiranës njoftoi të enjten arrestimin e një avokateje dhe dy personave të tjerë në kryeqytet, pasi akuzohen se tentuan të korruptojnë një prokuror të Prokurorisë së Tiranës me qëllim lehtësimin e pozitës së një të pandehuri.
Sipas njoftimit të policisë, avokatja Donata Lepenica, 57 vjeç, Yzeir Bala, 32 vjeç dhe Megi Naksi, 31 vjeçe u arrestuan, pasi Gjykata e Krimeve të Rënda vendosi masën e sigurisë “arrest me burg” për veprën penale të “korrupsionit aktiv ndaj gjyqtarit, prokurorit dhe funksionarëve të tjerë të drejtësisë”.
Hetimet për rastin e dyshuar të korrupsionit brenda Prokurorinë e Tiranës po kryhen nga Prokuroria e Krimeve të Rënda. Prokuroria e Përgjithshme i konfirmoi BIRN se pjesë e procedimit penal është edhe prokurori Përparim Hasa, ndërsa pozicioni i tij ligjor mbetet ende i paqartë.
“Nuk është marrë ende një masë ndaj prokurorit, por mund të konfirmoj se ai është pjesë e procedimit penal,” tha zëdhënësi i Prokurorisë së Përgjithshme, Denion Ndrenika.
BIRN tentoi të kontaktojë përmes telefonit me prokurorin Hasa, por nuk mori përgjigje prej tij.
Sipas raportimeve mediatike, hetimet për rastin e mësipërm nisën pasi Policia e Tiranës dhe Prokuroria e Krimeve të Rënda siguruan një bisedë të përgjuar mes një personi të arrestuar dhe avokates Lepenica, ku përmendej se “çështja ishte zgjidhur me prokurorin”. Ndërkohë, Prokuroria e Krimeve të Rënda ka marrë pamjet e kamerave të Prokurorisë së Tiranës për të verifikuar dyshimet për një takim të mundshëm mes avokates së arrestuar dhe prokurorit Hasa, në zyrën e këtij të fundit.