Dy persona me shtetësi amerikane u arrestuan të mërkurën nga policia pas një letër porosie nga SHBA ku ata kërkohen për tregtim lëndësh narkotike sintetike. Policia thotë se ata kishin ngritur një bazë në Tiranë.
Dy persona të kërkuar nga drejtësia në ShBA, me akuza për tregtim lëndësh narkotike përmes internetit (dark web) janë arrestuar sipas policisë ndërsa tentonin të largoheshin nga Shqipëri në pikën kufitare të Morinës. Në një njoftim për shtyp Policia e Shtetit thotë se në bashkëpunim me agjencinë amerikane të antidrogës DEA dhe Prokurorinë e Krimeve të Rënda, kishin arrestuar Vincent (Dominic) De Caro dhe Arbër Isaku me origjinë shqiptare, të dy të lindur në Nju Jork dhe me shtetësi amerikane.
“Në zbatim të letër porosisë të autoriteteve amerikane, si dhe pas vendimit të Gjykatës së Shkallës së Parë për Krimet e Rënda për zbatimin e saj, Departamenti i Policisë Kriminale në Policinë e Shtetit në bashkëpunim me Prokurorinë e Krimeve të Rënda dhe DEA-n amerikane pas një pune të mirë organizuar finalizuan me sukses operacionin e koduar “Sintetiku”, ku u arrestuan 2 shtetas amerikanë”, thuhet në njoftimin për shtyp.
Policia sqaron se dy të arrestuarit ndiqeshin nga drejtësia në SHBA dhe kishin një masë sigurie të arrestit me burg nga një gjykatë në Connecticut, për trafik narkotikësh sintetikë. Sipas njoftimit ata u mbajtën nën vëzhgim për rreth një muaj dhe policia ndërhyri, kur ata tentuan të kalonin kufirin për në Kosovë.
Policia thotë se ata akuzohen për “Prodhim dhe shitje të lëndëve narkotike dhe substancave psikotrope”. Sipas policisë dy të arrestuarit po përpiqeshin të bënin të njëjtën gjë në Tiranë ku kishin krijuar një bazë, ndërsa thuhet se u janë kapur mjete pune. Policia thotë se të dyshuarit e tregtonin drogën në internet. “Kjo vepër e kryer nëpërmjet “dark web””, thuhet në njoftim. “Gjatë kontrollit në bazën ku fshiheshin dhe zhvillonin aktivitetin kriminal këta shtetas, u gjetën dhe u sekuestruan mjetet dhe prekursorët që do të shërbenin për përgatitjen e drogave sintetike, si edhe një numër i madh pajisjesh elektronike”, njoftoi policia.
