Kristian Demokratët e Angela Merkelit i kanë bërë thirrje partisë simotër në Maqedoni, VMRO DPMNE, të mbështesë në parlament marrëveshjen me Greqinë, të cilën deri më tani e ka kundërshtuar, ose rrezikon ta izolojë Maqedoninë nga Europa.
Partia qeverisëse e qendrës së djathtë e Gjermanisë i ka kërkuar partisë së saj simotër opozitare në Maqedoni të mbështesë marrëveshjen me Greqinë në parlament ose të jetë politikisht përgjegjëse për bllokimin e integrimit të Maqedonisë në BE dhe NATO dhe për izolimin e vendit nga Europa.
Nënkryetari i grupit të Kristian Demokratëve/Kristian Socialiste në Bundestagun gjerman, Johann Wadephul, tha se duke qenë se pjesëmarrja në referendumin e marrëveshjes së emrit të së dielës në Maqedoni nuk arriti 50 për qind të pragut të elektoratit, votimi në parlament për marrëveshjen tani ishte vendimtar.
“Më shumë se 91 për qind e votuesve votuan në favor të ndryshimit të emrit të vendit në “Maqedonia e Veriut”, kujtoi ai, duke e quajtur këtë votim “për perspektivën e mëtejshme të vendit të tyre në NATO dhe BE “, raportoi të mërkurën agjencia shtetërore e lajmeve MIA e Maqedonisë.
Grupi parlamentar i CDU/SCU tha se i vinte keq që vetëm rreth 37 për qind e votuesve të mundshëm morën pjesë në referendum, shumë më pak sesa pjesëmarrja e kërkuar prej më shumë se 50 për qind.
Megjithatë, pasi rezultati i referendumit nuk konsiderohej i detyrueshëm, “është tepër e rëndësishme që në votimin në parlament të arrihet shumica e nevojshme e dy të tretave për ndryshimet kushtetuese dhe ndryshimin e emrit”, tha Wadephul.
Grupi CDU/SCU i bëri thirrje partisë kryesore opozitare në Maqedoni “të pajtohet me votimin historik dhe të rëndësishëm në parlament për ndryshimet kushtetuese. Përndryshe, ajo do të ishte politikisht përgjegjëse për bllokimin e kësaj rruge për Maqedoninë dhe për pasojë izolimin e vendit nga Europa”.
VMRO DPMNE deri tani e ka refuzuar marrëveshjen e arritur me Greqinë si një akt kapitullimi.
CDU-ja e Merkelit u pa gjerësisht si një mentore e rëndësishme për partinë VMRO DPMNE në përpjekjen e saj për t’u bashkuar me Partinë Popullore Europiane të qendrës së djathtë, EPP.
Koalicioni aktual maqedonas i qendrës së majtë, i cili mbështeti një votim “po” për marrëveshjen e emrit të arritur këtë verë, mban vetëm 71 nga 120 vendet në parlamentin maqedonas të përbërë nga 120 ligjvënës.
Janë nëntë më pak sesa 80 që nevojiten, që shumica e dy të tretave të mund të bëjë ndryshimet kushtetuese.
Pas referendumit, kryeministri maqedonas Zoran Zaev tha se do t’i jepte opozitës disa ditë kohë për të ndryshuar mendje dhe për të mbështetur marrëveshjen në parlament.
Përndryshe, tha ai, vendi do të shkojë në zgjedhje të parakohshme, në të cilat ai shpreson të marrë shumicën e nevojshme.