Komentet e fundit seksiste të kryeministrit kroat ndaj një gazetareve televizive – për të cilën ai ka kërkuar ndjesë –reflektojnë një traditë të gjatë të politikanëve ballkanas për të bërë komente seksiste ndaj gazetareve femra.
Kryeministri i Kroacisë, Andrej Plenkoviç, ka kërkuar menjëherë falje për një përgjigje patronizuese dhe seksiste ndaj një gazetareje femër, pasi ajo bëri një pyetje rreth një skandali që përfshinte rrjedhje të informacioneve të brendshme të policisë dhe të operacioneve të prokurorisë.
“Je shumë e ëmbël, Damira,” i tha Plenkoviç gazetares Damira Gregoret të mërkurën, pasi u pyet për skandalin që shpërtheu pasi policia arrestoi një punonjës IT i cili thuhet se kishte marrë informacionet.
Ai kërkoi menjëherë ndjesë, duke thënë se nuk kishte ndërmend të tregonte mungesë respekti.
Megjithatë, vrojtimi i Plenkloviçit është pjesë e një tradite të gjatë midis politikanëve të Ballkanit për të bërë vërejtje seksiste ndaj grave gazetarëve.
Në gusht, kryebashkiaku i Zagrebit Milan Bandiç i tha gazetares Ivana Pezo Moskaljov të tregohej “një zonjë grua”, gjatë një vizite në një fushën e grumbullimit të plehrave në Zagreb.
“Po të isha aq i mençur sa ti, do të punoja në Nova TV,” tha ai, duke shtuar: “Je si një mësuese e keqe, bëhu zonjë grua.”
Shoqata e Gazetarëve Kroatë e quajti këtë vërejtje të papërshtatshme dhe i kërkoi atij dhe figurave të tjera publike që të mos ofendonin më gazetarët se bëjnë pyetje në interes të publikut.
Politikanët gjetkë në rajonin e Ballkanit shpesh i trajtojnë njësoj gazetaret.
Kur u pyet në maj 2017 për emrin e lëvizjes së tij të re qytetare në Serbi, politikani dhe ish-avokati i popullit serb Sasa Jankoviç, i tha Minja Miletiç të N1: “Mund të ta thosha, por pastaj do të më duhej të të puthja.”
Në dhjetor të vitit 2015, ministri serb i mbrojtjes Bratislav Gasiç u kritikua për komentin e tij ofendues ndaj Zlatija Laboviç, një gazetare nga TV B92, gjatë një vizite në një fabrikë në Trstenik.
Pasi u ul në gjunjë që të mos pengonte operatorin e saj të filmonte, Gasiç tha: “Më pëlqejnë gazetaret femra që ulen në gjunjë lehtë.”
Gasiç më vonë kërkoi ndjesë për ofendimin që kishte shkaktuar dhe më vonë u pushua pasi shkaktoi zemërim publik. Në 2017 Gasiç u emërua të drejtonte Agjencinë e Sigurisë së Informacionit.
Lideri serb i Bosnjës Milorad Dodik, president i Republikës Srpska, është i famshëm për shfryrjen e shfrenuar para gazetarëve – burra dhe gra.
Në vitin 2008, Dodik i tha gazetares televizive Arijana Saraceviç Helaç kur ajo e pyeti për mendimin e tij për procesin e reformës kushtetuese në Bosnje: “Nuk më plas b…” duke përdorur këtë fjalë para gazetarëve dhe politikanëve të shumtë.
Në vitin 2011, Dodik pati një incident të ngjashëm kur Saraceviç Helaç po punonte për emisionin televiziv politik 60 minuta në televizionin e entitetit të Federatës. Pasi ofendoi programin televiziv, ai e komentoi gazetaren: “Je shumë e sjellshme, prandaj vendos të të flas, por nuk je fare e bukur.”
“Politikanët kroatë tregojnë një mungesë të plotë mirëkuptimi të funksionimit të mediave kroate dhe nuk janë në gjendje të merren me kritikat dhe me atë që bëjnë mediat, që është t’i shërbejnë publikut,” tha Hrvoje Zovko, kryetar i Shoqatës së Gazetarëve Kroatë të mërkurën për televizionin N1 rajonal.