Lideri militant serb i Bosnjës Milorad Dodik ka fituar vendin serb në presidencën shtetërore të Bosnjës, ndërsa aleatja e tij i ngushtë, Zeljka Cvijanoviç, ka dalë fituese në garën për presidencën e Republikës Srpska.
Lideri i serbëve të Bosnjës, Milorad Dodik, ka fituar vendin serb në presidencën trepalëshe të Bosnjës, sipas rezultateve ende të papërfunduara nga zgjedhjet e së dielës.
Tre anëtarët e kreut kolektiv të shtetit tani do të jenë Milorad Dodik, presidenti në largim i Republikës Srpska dhe kreu i Aleancës së Social Demokratëve të Pavarur, SNSD, Sefik Dzaferoviç nga Partia kryesore boshnjake për Veprim Demokratik, SDA, dhe Zeljko Komsiç, nga Fronti Demokratik.
Dodik, i famshëm për lidhjet e tij të ngushta me Rusinë dhe për mbështetjen e tij për pavarësinë e Republikës Srpska, tha se prioriteti i tij i vetëm do të ishte t’i shërbente interesave të popullit serb.
“Është një fitore shumë e qartë,” tha Dodik në Banja Luka, qyteti kryesor në Republika Srpska. “Nuk më intereson kush janë dy përfaqësuesit e tjerë në presidencë. Unë do të shkoj atje, në këtë presidencë, të punoj mbi të gjitha dhe vetëm për interesat e serbëve.”
Fitorja e Dodik, edhe pse pritej, do të trondisë ata që kanë përkrahur lidhje më të ngushta me Perëndimin, NATO-n dhe Bashkimin Europian. Edhe duket pro-BE, ai është një vizitor i shpeshtë në Rusi dhe ka krijuar një aleancë të ngushtë me presidentin rus Vadimir Putin.
Një tjetër shqetësim në zgjedhje ishte humbja e Coviç, kreu i partisë kryesore kroate të Bosnjës, Bashkimit Demokratik Kroat, HDZ BiH, dhe që humbi përballë Komsiçit në garën për vendin kroat.
Ai e akuzoi Komsiçin se u mbështet në votat boshnjake për fitoren e tij, duke paralajmëruar një tjetër krizë të mundshme në Bosnje.
HDZ më parë pretendoi se Komsiç i detyrohej fitores së tij presidenciale në vitin 2010 votave të boshnjakëve.
Pjesëmarrja në zgjedhjet në nivel shtetëror ishte 53.36 për qind. Në entitetin e Federatës, pjesëmarrja ishte 51.25 për qind, në Republikën Srpska, 57.30 për qind dhe rajonin e Brckos 46.81 për qind.
Zgjedhjet u zbehën nga fakti se aktualisht nuk ka bazë ligjore për zgjedhjen e një Dhome të re të Populli në entitetin e Federatës së Bosnjës – që do të thotë se asnjë qeveri e re nuk mund të formohet plotësisht në entitet apo në nivel shtetëror.
Kroatët e Bosnjës dëshirojnë që ligjet e zgjedhjeve të amendohen për të siguruar që boshnjakët, të cilët janë dominues në numër, të mos mund të zgjedhin përfaqësuesit kroatë, por kjo do të përfshinte ndarjen e të gjithë entitetit të Federatës në njësi elektorale me bazë etnike, gjë të cilën shumica e boshnjakëve e refuzon.
Sipas të njëjtëve rezultate të hershme, në të dy entitetet, SNDS –ja e Dodikut kryesonte në zgjedhjet për asamblenë e Republikës Srpska, e ndjekur nga Partia Demokratike Serbe, SDS.
Aleatja e ngushtë e Dodikut, Zeljka Cvijanoviç, kryeministrja në largim e Republikës Srpska, shpalli fitoren të hënën në garën për presidencën e Republikës Srpska.
Në entitetin e Federatës, partia më e fortë duket se ishte SDA-ja, e ndjekur nga një koalicion i mbledhur rreth HDZ-së dhe më pas Partia jo-etnike Social Demokrate, SDP.
