Në një konferencë për shtyp të martën, kryeministri Edi Rama deklaroi se elementë të krimit të organizuar, në bashkëpunim me opozitën politike dhe “skuta të shtetit shqiptar” kanë organizuar një komplot që synonte rrëzimin e qeverisë së tij.
Kryeministri Edi Rama del rrallë në konferenca për shtyp, por në një të tillë, të martën më 9 tetor, deklaroi se nga maji i këtij viti, një komplot është zhvilluar me synimin e rrëzimit të qeverisë së tij. Rama foli për historinë e denoncimit nga opozita të asaj që opozita pretendoi se ishin prova të përfshirjes së vëllait të Ministrit të Brendshëm Fatmir Xhafaj në trafikun e lëndëve narkotike. Ai përsëriti pretendimin e mëparshëm se përgjimi i pretenduar nga opozita i bisedës mes Albert Veizit, i njohur si Babalja dhe Agron Xhafajt është i sajuar dhe se Agron Xhafaj nuk është i përfshirë në atë bisedë. Por të martën, Rama deklaroi se ngjarja është sajuar jo thjeshtë për të sulmuar Ministrin e Brendshëm Fatmir Xhafaj, por edhe për të rrëzuar qeverinë e tij.
“Të jeni të bindur që shqiptarët do ta mësojnë nga a-ja deri te zh-ja se kush është përfshirë në një konspiracion të mirëfilltë për rrëzimin e qeverisë, sepse i tillë është”, tha Rama.
Sipas tij, “kemi bashkëpunim me elementë të krimit të organizuar, të burgosur për krim të organizuar, kemi korrupsion, kemi përfshirje të drejtpërdrejtë të partisë politike në bashkëpunim dhe me oferta korruptive dhe kemi edhe më shumë se kaq, sepse filmi është konceptuar dhe skenari është shkruar në dy skuta të shtetit shqiptar”. [Link]
Përmendja nga Rama e togfjalësisht [dy skuta të shtetit] nuk u kalua pa u vënë re nga gazetarët e pranishëm, të cilët ngritën pyetjen nëse ai i referohej Shërbimit Informativ Shqiptar. Rama refuzoi të shpjegonte se për çfarë skutash bëhej fjalë, por iu hakërrye gazetares që e pyeti duke thënë: “Jua kam lënë juve të bëni gazetari e të mos tundni dybekun në kazan”.
Gjuha fyese e Ramës ndaj gazetarëve dhe konotacioni mizogjen përballë gazetareve nuk është gjë e re. Por në këtë rast, Rama pretendoi gjithashtu se media nuk ka bërë sa duhet për të vërtetuar qëndrimin e tij mbi këtë çështje.
“Po të bëni gazetari, i jepni përgjigje shumë thjesht këtyre pyetjeve dhe ia kishit dhënë përgjigjet shumë më përpara sesa prokuroria të arrinte në gjysmë konkluzionet që ka arritur deri më tani”, tha ai.
Rama mendon se Prokuroria e Krimeve të Rënda, e cila ka hetuar çështjen, nuk ka arritur në konkluzionet e plota.
Prokuroria e Krimeve të Rënda në mënyrë të papritur të shtunën e kaluar njoftoi se po heton tre persona për “kallëzim të rremë” mbi çështjen. Prokuroria kërkoi masën e sigurisë Arrest me Burg për Albert Veliun dhe një person tjetër Fredi Alizoti, i cili raportohet se ka pranuar të luajë në përgjim rolin e Agron Xhafajt, i cili njihet edhe si Geron Xhafaj. Prokuroria ka kërkuar gjithashtu edhe masë sigurimi detyrim paraqitjeje për gazetarin Jetmir Olldashi. Sipas akuzës të tre janë përgjegjës për veprën penale Kallëzim të Rremë. Problemi është që Kallëzimi i Rremë nuk është vepër penale që shqyrtohet nga Gjykata e Krimeve të Rënda. Sipas Çlirim Gjatës, avokat i Olldashit, Prokuroria e Krimeve të Rënda dhe Gjykata e Krimeve të Rënda kanë kryer gabim procedural duke vijuar hetimin e çështjes, e nisur fillimisht me dyshimin e trafikut të narkotikëve, por e vijuar si “kallëzim i rremë”.
Gjata kërkoi para Gjykatës së Krimeve të Rënda të martën shpalljen e moskompetencës në këtë çështje, por Gjykata e refuzoi kërkesën. Olldashi është deklaruar i pafajshëm duke argumentuar se ai nuk ka kryer ndonjë kallëzim në autoritetet shqiptare dhe rrjedhimisht nuk mund të ketë kryer veprën penale të kallëzimit të rremë.
“Kallëzimi i rremë është një vepër penale e dobët. Me të tilla vepra penale nuk merret Prokuroria e Krimeve të Rënda por prokuroritë e zakonshme,” argumentoi Gjata.
Në një njoftim për shtyp të shtunën, prokuroria tha se fillimisht nisi hetimin për “Trafikim të narkotikëve”, por se “Nga veprimet hetimore të kryera lidhur me vërtetësinë e audio-regjistrimit të bisedës së zhvilluar midis “Bashkëpunëtorit X” dhe “Agronit” ekziston dyshimi që jemi para veprës penale të “kallëzimit të rremë, në bashkëpunim”.
Kreu i Partisë Demokratike, e cila publikoi audio-përgjimin, Lulzim Basha sulmoi prokurorinë si të varur nga qeveria, ndërsa tha se nuk mund të pritej diçka tjetër “nga prokuroria Rama-Marku-Xhafa- Prela”. Basha tha se Rama i kishte vënë kështu zjarrin shtetit ligjorë dhe bëri thirrje për “rrëzimin me çdo mjet të mafias në pushtet”. PD sëfundmi bëri akuza të reja ndaj Agron Xhafës, duke e akuzuar për lidhje të dyshimta me kumarin.
Kryeministri Edi Rama është përballur me një numër të lartë akuzash për lidhje të drejtpërdrejta me elementë kriminalë, përfshirë disa deputetë socialistë dhe së paku një kryetari bashkie të zgjedhur prej tij. Por kjo është hera e parë që ai pretendon se një komplot është krijuar me synimin e rrëzimit të qeverisë së tij.