Ministria e jashtme e Kosovës konfirmoi se autoritetet serbe kanë liruar dentistin Ibrahim Matoshi, i cili u ndalua në gusht bazuar në një aktakuzë që e lidhte atë me luftën e viteve 1998-1999.
Ministri i Jashtëm i Kosovës Behgjet Pacolli tha të hënën se autoritetet serbe kanë liruar Ibrahim Matoshin, një dentist i cili u arrestua dy muaj më parë në pikën e kalimit në Dheu i Bardhë ndërsa po kthehej në Gjermani pas pushimeve në Kosovë.
“Sapo mora raportin nga Zyra Ndërlidhëse e Kosovës se avokati i Ibrahim Matoshi njoftoi lirimin e Matoshit. Ne do të presim për konfirmimin përfundimtar zyrtar dhe për kthimin e tij në territorin e Kosovës, në mënyrë që të afërmit e tij dhe të gjithë ata që janë marrë me këtë çështje të mund të ndjejnë një lehtësim emocional dhe shpirtëror,” shkroi Pacolli në Facebook.
Ai shtoi se Serbia duhet të respektojë parimet e lirisë së lëvizjes.
Ministria e jashtme tha në kohën e arrestimit të Matoshit se besonte se ai ishte ndaluar bazuar në akuza që kishin lidhje me një “aktakuzë si në rastet tjera kundër qytetarëve të Kosovës nga periudha e luftës”.
Matoshi vjen nga qyteti lindor i Gjilanit, por tani jeton në Gjermani, dhe si shumë shqiptarë të tjerë të Kosovës që jetojnë jashtë vendit, ai vizitoi vendin e tij të origjinës për pushime verore.
Kur ai u arrestua, ministria e jashtme e Kosovës akuzoi Beogradin për shkelje të të drejtave të njeriut të qytetarëve të Kosovës që përdorin territorin serb si një vend tranzit gjatë udhëtimeve të tyre të pushimeve.
