Një 21-vjeçar i quajtur Severin Krassimirov është ndaluar në Gjermani si i dyshuari kryesor për vrasjen e gazetares bullgare Victoria Marinova, vrasja brutale e të cilës është dënuar gjerësisht dhe ka tërhequr vëmendje ndërkombëtare.
Një 21-vjeçar bullgar i quajtur Severin Krassimirov është i dyshuari kryesor në hetimin e vrasjes brutale të gazetares Victoria Marinova, thanë autoritetet bullgare të mërkurën.
ADN-ja e Krassimirov u gjet në trupin e Marinovës, u tha gazetarëve Ministri i Brendshëm Mladen Marinov, duke shtuar se ai u arrestua në Gjermani.
Ai gjithashtu tha se i dyshuari jetonte pranë skenës së krimit.
Ministri tha se të gjitha versionet për motivet e tij të mundshme për vrasjen e gazetares mbetën në tryezë.
Prokurori i Përgjithshëm Sotir Tsatsarov theksoi se “në këtë fazë nuk mund të themi se vrasja kishte lidhje me punën profesionale të Marinovës”.
Tsatsarov tha se i dyshuari do të akuzohej për përdhunim dhe vrasje me paramendim.
Dënimi për këto akuza varion në 10-20 vjet burg ose edhe me burgim të përjetshëm.
Ai theksoi se Krassimirov u largua nga Bullgaria duke përdorur urën midis Ruse dhe qytetit fqinj rumun të Giurgut më 7 tetor, pak pas orës 14:00, një ditë pas vrasjes.
Një kalimtar i njoftoi autoritetet në orën 14:27 më 6 tetor për një trup që dukej në shëtitoren e lumit Danub, i cili u identifikua më vonë si ai i gazetares 30-vjeçare të TVN.
Kryeministri Boyko Borissov ndërkohë akuzoi kundërshtarët e tij politikë se po e përdornin vrasjen për të prishur reputacionin e vendit dhe për ta portretizuar atë si të pasigurt.
“Kam lexuar gjëra monstruoze rreth Bullgarisë në tri ditët e fundit dhe asgjë nuk ishte e vërtetë,” tha Borissov të mërkurën, duke akuzuar se disa “politikanë po dërgojnë emaile në Bruksel dhe SHBA, sikur kjo nuk është diçka që ndodh edhe në vendet e tjera.”
Ai tha se kishte shmangur me qëllim spekulimet rreth çështjes “sepse mendova se ajo që na mësojnë në BE në lidhje me hetimet e drejtësisë dhe të policisë, është të mos fajësojmë asnjë derisa të ketë prova të qarta se kush është fajtori, ndërkohë që ata (kundërshtarët e tij politikë) na kanë sulmuar kaq keq”.
Ndërkohë, ish-bashkëshorti i viktimës, drejtori i TVN Svilen Maksimov, tha për Nova TV se ai nuk kishte pritur që ky rast të tërhiqte kaq shumë vëmendje.
“Shpresoj që shteti dhe njerëzit të përgjigjen në të njëjtën mënyrë si në çdo rast tjetër kur një qenie njerëzore është në rrezik. Kur ndodh kjo, ne mund ta quajmë veten “një shtet”, tha ai.
Duke treguar dyshimin e tij se ajo është vrarë në lidhje me punën e saj, ai tha se “të gjitha provat tregojnë drejt një rastësie absurde dhe të tmerrshme”, duke shtuar se “nuk ngjan si një vrasje profesionale, gjë e cila më lehtëson disi.”
Natyra brutale e vrasjes ka tërhequr vëmendje të madhe ndërkombëtare dhe Komisioni Europian, ndër të tjerë, ka kërkuar një hetim të shpejtë dhe të plotë.
