Politikanë të lartë në Prishtinë dhe Beograd dënuan sulmin ndaj dy autobusëve me pelegrinë serbë që shkonin në një manastir ortodoks serb në Kosovën lindore.
Sulmi me gurë e dy autobusëve që po çonin serbë të vizitonin një manastir ortodoks në fshatrat Studenicë pranë qytetit lindor të Istogut të dielën, është dënuar në Kosovë dhe Serbi.
Nuk u raportuan lëndime si pasojë e sulmit me gurë, i cili u krye nga sulmues të panjohur.
Presidenti i Kosovës Hashim Thaçi tha se të gjithë në vend duhet të gëzojnë të drejtën e lirisë së lëvizjes.
“Shkelja e kësaj të drejte është një akt i papranueshëm,” shkroi Thaçi në Facebook, duke i bërë thirrje autoriteteve policore të sjellin ara drejtësisë autorët e sulmit.
Kryeministri i Kosovës Ramush Haradinaj tha se sulmi ishte i papranueshëm “pa marrë parasysh cilët ishin autorët apo se cilat ishin arsyet”.
“Kosova dhe institucionet e saj janë të angazhuara për paqe dhe stabilitet dhe çdo lloj sulmi ndaj qytetarëve është një sulm ndaj vlerave tona të përbashkëta europiane dhe si të tilla të dëmshme për Republikën tonë,” tha Haradinaj.
Në Beograd, kreu i zyrës së Kosovës të qeverisë serbe, Marko Djuriç, i quajti sulmuesit “ekstremistë shqiptarë” të cilët kundërshtojnë tolerancën fetare dhe “përbuzin të kaluarën e krishterë të komunës sonë jugore dhe monumentet e trashëgimisë ortodokse serbe”.
“Europa nuk duhet të qëndrojë e verbër dhe pasive përballë zgjerimit të ekstremizmit dhe radikalizmit fetar në Kosovë dhe Metohi, sepse kjo është një murtajë që nuk njeh kufij dhe mund të kërcënojë kryeqytetet europiane nesër,” tha Djuriç në një njoftim për shtyp të dielën.
Ministri i Tregtisë i Serbisë Rasim Ljajiç tha të hënën se serbët duhet t’i raportojnë të gjitha sulmet e tilla në organizatat ndërkombëtare.
“Kjo nuk do ta zgjidhë problemin, por mund të tërheqë vëmendjen për situatën e tyre të vështirë,” tha Ljajiç për TV Prva të Serbisë, duke shtuar se kjo ishte një çështje “të drejtash dhe sigurie themelore”, jo politike.
Misioni i OSBE-së në Kosovë gjithashtu e dënoi incidentin duke thënë të hënën se “shoqëria në tërësi ka një përgjegjësi për të ruajtur dhe mbështetur parimet e tolerancës dhe marrëdhënieve të mira ndër-komunitare”.
