Gjykata u dha 2 javë kohë shtesë më 9 tetor për konkluzionet, por avokatët e Emiliano Shullazit dhe bashkëakuzuarve nuk ishin sërish gati të martën, ndërsa u ankuan se dosja e prokurorisë nuk ishte llogjike. Prokuroria ka kërkuar 64 vjet burg për të akuzuarit.
Avokatët e Emiljano Shullazit dhe katër të akuzuarve të tjerë si bashkëpunëtorë të tij në gjobëvënie dhe shantazhe, kërkuan më shumë kohë për përgatitjen e konkluzioneve përfundimtare, me arsyetimin se u duhej t’u siguronin një mbrojtje efektive klientëve të tyre. Prokuroria pranoi shtyrjen dhe kërkoi që gjatë kësaj kohe të pezulloheshin afatet e paraburgimit.
Shqyrtimi gjyqësorë i çështjes është mbylluar në qershor të këtij viti, por pas një sërë mungesash të avokatëve dhe më pas problemeve në Prokurorinë e Krimeve të Rënda, pretenca u lexua vetëm më 2 tetor. Pas leximit të pretencës avokatët morën fillimisht një javë kohë për konkluzionet, por në seancën e rradhës më 9 tetor kërkuan një javë shtesë. Gjykata u dha atëherë 2 javë në mënyrë që të përgatisnin mbrojtje efektive. Por mëngjesin e të martës (23 tetor) avokatët u paraqitën për të kërkuar kohë shtesë, ndërsa u ankuan se dosja e prokurorisë ishte pa llogjikë.
Avokati mbrojtës i të pandehurit Emiljano Shullazi, Vladimir Meçe, ka qenë i pari që ka bërë këtë kërkesë duke theksuar se dosja është mjaft voluminoze dhe pa një vijim logjik. “Është shumë e vështirë t’i përgjigjesh absurdit”, u shpreh avokati Meçe para gjykatës, duke kërkuar kështu shtyrjen e seancës për një tjetër datë. Të njëjtin qëndrim mbajtën edhe avokatët e tjerë të të pandehurve, Gilmando Dani, Endrit Qyqja, Endrit Zela dhe Blerim Shullazi, të cilët bashkë me Shullazin akuzohen për grup të strukturuar kriminal
Në këto kushte, kryetari i trupës gjykuese Fran Prendi kërkoi qëndrimin e prokurorisë lidhur me këtë kërkesë. Prokurorët e çështjes kërkuan pezullim të afateve të paraburgimit nëse do të vendosej shtyrja e seancës gjyqësore.
Duke qenë se asnjë prej mbrojtësve nuk kishte përgatitur konkluzionet përfundimtare për kilentët e tyre, gjykata vendosi shtyrjen e seancës për në datën 30 tetor, ora 09:00, si edhe pezullimin e afateve të paraburgimit të të pandehurve. Edhe në seancën paraardhëse të zhvilluar më datë 9 tetor, mbrojtësit e të pandehurve të sipërcituar kërkuan më shumë kohë për përgatitjen e konkluzioneve përfundimtare.
Seana e të martës është ndjekur edhe nga pjesëtarë të përfaqësive diplomatike në Tiranë, konkretisht të atyre amerikane, gjermane e suedeze. Emiljano Shullazi, Gilmando Dani, Endrit Qyqja, Endrit Zela dhe Blerim Shullazi, akuzohen për krijim të grupi të strukturuar kriminal, shtrëngim për dhënie pasurie; shkatërrim të pronës me lëndë plasëse e kanosje ndaj biznesmenëve Ylvi Beqja, Jani Zaka dhe Adriatik Këçuku, si edhe kërcënimin për t’u tërhequr nga gara për rektor të dekanit të Fakultetit të Shkencave të Natyrës, Mynyr Koni, e kanosjen e rektorit Dhori Kule.
Prokuroria pranë Gjykatës së Shkallës së Parë për Krime të Rënda, në konkluzionet e saj, që u lexuan më 2 tetor, kërkoi dënimin e të pesë të pandehurve në total me 64 vite burg. Për Emiljano Shullazin u kërkua dënimi me 17 vite burg, të cilin e cilësuan edhe si krijues dhe drejtues i grupit të strukturuar kriminal. Për Gilmando Danin, që e cilësuan si krahun e djathtë të Emiljano Shullazit, prokuroria kërkoi dënimin e tij me 15 vjet heqje lirie, për Endrit Qyqjan e Endrit Zelën nga 11 vite burg për secilin dhe për Blerim Shullazin 10 vjet heqje lirie.
