Nga viti 1999 deri në vitin 2018, gjykatat e Kosovës kanë dëgjuar 48 raste krimesh lufte me një total prej 111 të pandehurish në gjyqe, tha një raport i publikuar nga Fondi për të Drejtën Humanitare.
Fondi për të Drejtën Humanitare në Kosovë të enjten publikoi një pasqyrë të rasteve të krimeve të luftës në Kosovë nga viti 1999 deri në mesin e qershorit të këtij viti.
Nga 48 raste të dëgjuara në gjykatat e Kosovës gjatë kësaj periudhe, 25 ishin gjyqe serbësh, 19 ishin gjyqe shqiptarësh etnikë, tre malazezësh dhe një i një të pandehuri rom, gjithsej 111 të pandehur.
Në gjyqe, 38 janë liruar nga akuzat dhe 39 janë dënuar, nga të cilët 34 ishin shqiptarë etnikë, katër ishin serbë dhe një ishte malazez.
Një total prej 28 të akuzuarish janë në arrati – dy prej tyre shqiptarë etnikë, plus 24 serbë që ia kanë mbathur nga një qendër paraburgimi në qytetin e Mitrovicës, dhe dy malazezë.
Koordinatorja e projektit, Anka Kurteshi Hajdari, tha se publikimi ishte rezultat i monitorimit sistematik të gjyqeve të krimeve të luftës.
“Të zotërosh një dokumentacion të tillë të pasur ishte një ndihmë e madhe në përpilimin e publikimit të prezantuar sot që përmban një përmbledhje të gjykimeve të krimeve të luftës që ndodhën në Kosovë pas konfliktit të armatosur,” tha Kurteshi Hajdari.
Aktakuzat e para për krime lufte në Kosovë u ngritën pas konfliktit në qershor 1999 nga prokurorët vendas, por nga fillimi i vitit 2000, këto raste u trajtuan nga organet ndërkombëtare, fillimisht misioni i OKB-së, UNMIK, dhe më pas nga EULEX-i.
