Një diplomat i BE-së tha se qindra emigrantëve dhe refugjatëve, të grumbulluar në kufirin e Bosnjës me Kroacinë për të dytën ditë radhazi, duhet t’u thuhet se emigracioni ilegal është i papranueshëm.
Johannes Peterlik, Sekretari i Përgjithshëm i BE-së për Punët e Jashtme, tha për mediat në Sarajevë të enjten se emigrantët dhe refugjatët aktualisht në Bosnjë duhet të njoftohen se po përpiqen të ndjekin rrugën e gabuar drejt BE-së.
Diplomati austriak po komentonte mbi tensionet e vazhdueshme në Bosnjën veriore, ku një grup prej qindra refugjatësh po përpiqeshin të kalonin kufirin për në Kroaci.
“Austria do ta bëjë të qartë se emigrimi ilegal nuk është një rrugë që mund dhe duhet ndjekur. Ka mënyra ligjore dhe kjo duhet të jetë e qartë,” tha Peterlik në një konferencë për shtyp pas takimit me zv/ministrin e jashtëm të Bosnjës.
Peterlik tha se Austria është e vetëdijshme se numri i refugjatëve në Bosnje është në rritje dhe do të bëjë gjithçka për ta mbështetur vendin.
Ndërkohë, në pikën kufitare të Maljevacit të Bosnjës, policia kufitare ngriti një gardh midis tyre dhe grupit të emigrantëve dhe refugjatëve që përpiqen të hyjnë në shtetin fqinj të BE-së.
Agjencia e lajmeve Anadolu njoftoi të enjten se grupet e fëmijëve mbanin pankarta që thoshin “Hapni kufirin” dhe “Na ndihmoni”, ndërsa disa u kërkuan ushqim gazetarëve që raportonin nga pikat kufitare.
Të mërkurën, disa emigrantë dhe refugjatë u lënduan teksa përpiqeshin të thyenin një kordon policor që i pengonte ata të kalonin pikën kufitare.
Emigrantët dhe refugjatët gjithashtu po bllokonin rrugën kryesore drejt pikës kufitare, e cila ishte e mbyllur për trafikun.
Zëdhënësja e policisë kufitare të Bosnjës, Sanela Dujkoviç, tha të enjten për mediat se situata në pikën kufitare tani është nën kontroll, por emigrantët dhe refugjatët do të largohen nga atje.
“Për momentin, rreth 150 emigrantë dhe refugjatë po refuzojnë të largohen, por kjo duhet të ndodhë përfundimisht, me shpresë pa përdorimin e asnjë force,” tha Dujkoviç duke shtuar se policia kufitare po negocionte me emigrantët dhe refugjatët.
Që nga fillimi i vitit deri më 17 tetor, vetëm rreth 18,000 emigrantë dhe refugjatë u regjistruan se kanë hyrë në Bosnje dhe Hercegovinë, shumë prej të cilëve po udhëtojnë në rrugën e re të ashtuquajtur “Rruga ballkanike” drejt Europës Perëndimore, e cila kalon nëpër Shqipëri, Mal të Zi, Bosnje dhe në disa raste Serbi.
