Një minoritar grek mbeti i vrarë të dielën pas një përplasje me armë me forcat speciale të policisë, ndërsa më herët kishte qëlluar një patrullë. Incidenti ndodhi ditën e festës kombëtare greke në fshatin Bularat të Gjirokastrës.
Një 35-vjeçar i identifikuar si Konstandinos Kacifa, shtetas i Shqipërisë dhe Greqisë, u vra nga policia të dielën, në fshatin minoritar Bularat pranë Gjirokastrës. Policia njoftoi se kishte tentuar të arrestonte Kacifan, pasi ai më herët kishte qëlluar mbi një patrullë të saj.
Incidenti ndodhi gjatë festimeve në fshat të festës kombëtare greke të njohur si ‘Oxi Day’ (Dita Jo).
Sipas raportimeve të policisë Kacifa qëlloi fillimisht në ajër dhe më pas ndaj një makine policie që shkoi të kontrollonte pas të shtënave. Pas kësaj forcat speciale RENEA u dërguan në zonë. Ato e ndoqën 35-vjeçarin deri në një mal pranë fshatit.
Policia tha se ai nuk iu bind urdhrave për tu dorëzuar, madje hapi zjarr ndaj forcave speciale. Një automatik Kallashnikov dhe municione u gjetën në vendin ku ai u qëllua.
“Forcat RENEA u përgjigjën dhe gjatë shkëmbimit të zjarrit, K.K. mbeti i vrarë,” njoftoi policia në një deklaratë për shtyp.
Zyrtarisht nuk ka një motiv rreth incidentit, por mediat në Shqipëri dhe Greqi, kanë spekuluar se Kacifa ishte një nacionalist, ndërsa kanë publikuar foto të tij me uniformë ushtarake greke.
Në herët autoritete greke, përfshi ministren e Kulturës së Greqisë Myrsini Zorba dhe shqiptare bënë homazhe pranë varreve të ushtarëve grekë të rënë gjatë luftës Italo-Greke në Shqipëri, që ndodhen në varrezën e Bularatit.
Zorba shkroi në faqen e saj në Facebook se çdo gjë kishte shkuar mirë gjatë cermonisë, ku ishin nderuar të rënët, ishin kënduar himnet e dy vendeve dhe fëmijët kishin lexuar poezi.
Ndërkohë Ministria e Jashtme e Greqisë shprehu keqardhje për vdekjen dhe i kërkoi Shqipërisë të hetonte rrethanat e ngjarjes.
“Është e papranueshme që operacioni përfundoi me humbjen e një jete njerëzore. Ne po presim që autoritetet shqiptare të qartësojnë plotësisht rrethanat në të cilat një qytetar grek humbi jetën, dhe pas kësaj ne do të ndërmarrim veprimet e duhura menjëherë,” thuhet në deklaratë.
Ministria e Punëve të Jashtme e Shqipërisë u përgjigj se politizimi i ngjarjes ishte i papranueshëm.
“Kjo është një ngjarje totalisht e izoluar nga aktivitetet e sotme ne zonë dhe një rast flagrant agresioni ekstremist ndaj Policisë së Shtetit Shqiptar,” thuhet në reagimin e ministrisë.
“Shqipëria është një vend i sigurt për të gjithë qytetarët, pa asnjë dallim ata me kombësi greke”, thuhet në njoftim.
Kryeministri Edi Rama reagoi në Twitter duke iu drejtuar Athinës.
“Fqinj të dashur! Në vend ta quani të papranueshme humbjen e jetës së një të fandaksuri që qëlloi me plumba luftarakë mbi policinë tonë, e cila bëri vetëm detyrën e saj, bashkohuni me ne në falenderimin e Zotit që asnjë jetë e pafajshme nuk humbi sot nga marrëzia ekstremiste”, shkroi ai.
Gazeta greke Kathimerini raportoi se të dielën në mbrëmje dhjetëra protestues u mblodhën para Ambasadës Shqiptare në Athinë.
Incidenti ndodhi në një prej bashkive të minoritetit grek në Shqipëri, i cili jeton kryesisht në zonën kufitare mes dy vendeve. Sipas censusit të vitit 2011, numri i minoritarëve në vend është 24,000. Marrëdhëniet e minoritarëve dhe shqiptareve janë zakonisht miqësore. Megjithatë edhe më herët gjatë tri dekadave të fundit janë regjistruar tensione, kryesisht mes nacionalistëve të të dy krahëve.
Episodi më i rëndë i regjistruar është ai i vitit 1994, kur dy ushtarë shqiptarë u ekzekutuan katër kilometra brenda kufirit shqiptarë. Një grup paramilitar grek mori përsipër vrasjet.
