Ambasadorja e Greqisë në Tiranë Eleni Surani u thirr për herë të dytë brenda dy ditëve në Ministrinë e Jashtme për të marrë notë proteste në lidhje me disa incidente të regjistruara në Greqi kundër shqiptarëve pas vrasjes të dielën të minoritarit grek Kostandinos Kacifa.
Shqipëria dorëzoi një notë proteste ndaj Greqisë të mërkurën, e dyta në dy ditë, për shkak të indicenteve të urrejtjes të regjistruara në Greqi pas vrasjes të dielën nga forcat e policisë shqiptare të Kostandinos Kacifas, një minoritar grek i Shqipërisë, i cili hapi zjarr ndaj policisë në fshatin Bularat të Dropullit.
Ministria për Europën dhe Punët e Jashtme bëri të ditur në një njoftim për shtyp se ambasadorja Eleni Surani u thirr në ministri për shkak të disa ngjarjeve, përfshirë një alarm për bombë pranë ambasadës shqiptare në Athinë, sulmi me zjarr ndaj bizneseve shqiptare në Greqi si dhe djegia e flamurit shqiptar në Athinë të martën.
“Ambasadores iu kërkua distancimi dhe në të njëjtën kohë, dënimi nga ana e autoriteteve greke ndaj këtyre akteve të rënda që cenojnë klimën e marrëdhënieve miqësore mes fqinjëve”, thuhet në njoftim. Ministria i kërkoi gjithashtu autoriteteve greke të marrin masa për të mbrojtur jetën dhe pronën e shqiptarëve që jetojnë në Greqi.
Incidentet në Greqi pasuan vrasjen të dielën të Kostandinos Kacifas, një minoritar grek në Shqipëri, i cili hapi zjarr ndaj policisë shqiptare me një automatik Kallashnikov.
Vrasja e tij në fshatin Bularat ndodhi në 28 tetor, një ditë që është festë kombëtare në Greqi dhe që festohet edhe nga komunitetet e grekëve nëpër të gjithë botën, përfshirë Shqipërinë.
Policia shqiptare bëri të ditur se i kishte bërë thirrje Kacifës të dorëzohej por ai i ishte përgjigjur me zjarr, duke e detyruar policinë ta qëllonte. Por familjarët e viktimës dhe përfaqësues politikë të minoritetit grek mendojnë se policia është nxituar në ekzekutimin e tij dhe se neutralizimi i tij ishte i mundur.
Të martën në mbrëmje, trupi i pajetë i 35 vjeçarit u transferua në Institutin e Mjekësisë Ligjore në Tiranë ku pritet të kryhet ekspertiza mjeko-ligjore.
Media greke bëri të ditur se një kërkesë është dorëzuar nga Ambasada e Greqisë në Tiranë te Prokuroria e Përgjithshme për të pasur një mjek ligjor grek gjatë ekzaminimit të trupit të tij. Gjithsesi një zëdhënës i Prokurorisë i tha BIRN se një kërkesë e tillë nuk ka mbërritur në këtë institucion.
Ambasada e Greqisë nuk iu përgjigj menjëherë kërkesave të BIRN për koment.
Që nga vrasja e Kacifës të dielën, një numër incidentesh kanë ndodhur në Greqi që dyshohet se kanë motive të urrejtjes ndaj shqiptarëve. Të martën në darkë, një protestë u organizua para parlamentit të Greqisë në Athinë, ku protestuesit hodhën parrulla urrejtjeje dhe dogjën një flamur shqiptar.
Ndërkohë në Tiranë, një parrullë raciste u shfaq mes tifozëve të Partizanit në ndeshjen përballë Skënderbeut. Parrulla ku shkruhej: “1 Grek më pak – 1 bastard më pak”.
Federata Shqiptare e Futbollit e dënoi shfaqjen dhe njoftoi se ndërmerrte masa kundër Partizanit.
“Duke i nxjerrë kartonin e kuq këtij rasti të rrezikshëm për imazhin e futbollit, i sigurojmë të gjithë se do të merren të gjitha masat përkatëse që raste të tilla skenarësh dritëshkurtra jo vetëm të mos kalojnë pa u ndëshkuar por kurrsesi të mos përsëriten e të mos njollosin imazhin e lojës së futbollit,” deklaroi FSHF.
