Një grup studentësh protestuan të enjten para kryeministrisë, ku kërkuan uljen e tarifave të studimit në universitetet publike dhe e nxitën qeverinë të rrisë buxhetin për arsimin në Shqipëri.
Me thirrjet “ulni tarifat” dhe “rritni buxhetin” disa qindra studentë marshuan të enjten nga korpusi i universitetit drejt kryeministrisë, ku i parashtruan qeverisë tre kërkesat e tyre.
Studentët kërkuan përgjysmim të tarifave, rritje të buxhetit për universitetet publike, si dhe krijimin e një enti publik që do të menaxhojë botimin e librave universitarë.
Të zemëruar nga barra e lartë financiare për shkollimin e tyre, korrupsioni në auditore përmes blerjes së notës dhe shitjes së detyruar të librave nga pedagogët, protestuesit e akuzuan qeverinë Rama se i ka harruar studentët dhe i ka nxjerrë ata nga lista e prioriteteve.
Studentët i quajtën të pabaza argumentet e qeverisë se nuk ka para për rritjen e buxhetit në arsim.
“Jemi kundër zhvatjes që po na bëhet. Një qeveri që ka 40 milionë euro për dy km rrugë, duhet t’i ketë po aq për arsim publik, cilësor dhe të përballueshëm për të gjithë,” tha Klodi Leka, aktivist studentor nga lëvizja “Për Universitetin”.
Në protestën që zgjati rreth dy orë, studentët u ankuan se tarifat aktuale vënë në vështirësi financiare familjet e tyre, ndërsa të ardhurit nga rrethet përballen me konvikte në gjendje të mjerueshme dhe çmime të kripura qiraje në kryeqytet.
“2015 është viti kur në Shqipëri vdiq universiteti. Realisht vdiq, me ligjin e arsimit të lartë,” tha në protestë aktivisti Dardan Konjufca.
“Tarifa jonë është zhvatje, tarifa për të cilën paguajmë për studimet është vjedhje. Këta po na vjedhin në çdo hap,” shtoi ai.
Protestës së studentëve iu bashkuan edhe pedagogë, të cilët përgjatë viteve të fundit kanë ngritur zërin duke kërkuar rritje të pavarësisë së universitetit dhe përmirësim të cilësisë së tij.
“Ata na duan të paarsimuar dhe të keqarsimuar. Pse? Sepse kështu ne nuk kuptojmë poshtërsitë e tyre,” akuzoi pedagogu Arlind Qori, ndërsa qindra pjesëmarrësit brohoritën “turp”, “turp”, “turp”.
Një tjetër student tha me pesimizëm se degradimi aktual i jetës universitare në Shqipëri po i detyron të rinjtë shqiptarë të largohen nga vendi, pavarësisht se disa prej tyre duan ta ndërtojnë jetën e tyre në atdhe.
“Gjithë studentët po mundohen të ikin jashtë shtetit. Se këtu nuk po gjejnë asnjë lloj mundësie. Unë jam qytetar shqiptar. Unë nuk dua të largohem nga vendi im. Dua të studioj në vendin tim, të arsimohem në vendin tim,” u shpreh ai.
Foto:
