Daniel Dobraj, 18 vjeç, ndaj të cilit prokuroria ngriti 4 akuza përfshi “plagosje të rëndë me dashje” , u la nga gjykata me masë sigurie arrest me burg. Dobraj akuzohet se hodhi kapsolla ndaj policisë gjatë protestës së banorëve të Unazës së Re para parlamentit.
Gjykata e Faktit vendosi të caktojë masë sigurie arresti me burg për 18-vjeçarin e akuzuar se hodhi kapsollën që plagosi një punonjëse policie e cila pësoi lëndime të rënda në dorë, gjatë në protestën e të ejtes para parlamentit. Daniel Dobraj i cili akuzohet ndër të tjera edhe për “plagosje të rëndë me dashje”, u paraqit të hënën në gjykatë me një dorë të fashuar. Dobraj pretendon se policia e ka dhunuar dhe ka synuar t’i thyej gishtërinjtë.
Dobraj ishte pjesë e protestës kundër prishjes së ndërtimeve që sipas qeverisë bien në vijën e zgjerimit të Unazës së Madhe. Banorët kundërshtojnë vlerën e dëmshpërblimit të caktuar nga qeveria, ndërsa një pjese prej tyre të palegalizuar u është premtuar vetëm qira nga bashkia.
Gjatë protestës banorët tentuan të hyjnë në sallën në të cilën zhvillonte punimet parlamenti, por u ndaluan nga policia. Gjatë përplasjes prej protestuesve u përdorën kapsolla dhe sipas policisë një dyzinë e punonjësve të saj u dëmtuan, përfshi punonjësen e policisë Ina Nuka e cila humbi dy gishta.
Plagosja e Nukës dhe arrestimi i Dobraj u bënë pjesë e debatit politik, ndërsa kryeministri Edi Rama dhe shumica akuzuan opozitën dhe protetsuesit për dhunë ndaj policisë. Në të kundërt kreu i PD-së Lulzim Basha akuzoi qeverinë dhe policinë se kishte dhunuar protestuesit. Ish-kryeministri Sali Berisha akuzoi policinë se kishte tentuar t’i thynte gishtat të arrestuarit.
Të dielën, Gjykata e Tiranës caktoi po ashtu masat e sigurisë edhe për 11 të ndaluar të tjerë gjatë protestës para parlamentit. Gjykata vendosi të caktojë masën e sigurisë “arrest në burg” vetëm për një prej të ndaluarve, ndërsa për 10 të tjerët vendosi detyrim për t’u paraqitur tre herë në muaj në Prokurorinë e Tiranës.
Gjatë seancës për masën e sigurisë në sallën e gjykatës kanë qenë edhe përfaqësues të medias dhe disa deputetë të Partisë Demokratike dhe të Partisë Lëvizja Socialiste për Integrim, por gjyqtari Besnik Hoxha kërkoi zhvillimin e masës së sigurisë pa praninë e tyre.
Prokurorët e çështjes, Kreshnik Ajazi dhe Ndini Tavani kërkuan vlerësimin si të ligjshëm të ndalimit të 18-vjeçarit Drobaj dhe kanë kërkuar caktimin e masës së sigurisë “arrest në burg” ndaj tij për veprat penale “plagosje e rëndë me dashje”, “organizimi dhe pjesëmarrja në grumbullime dhe manifestime të paligjshme”, “Prishje e rendit dhe qetësisë publike” dhe “goditja për shkak të detyrës”.
Ndërkohë, avokati mbrojtës i Drobajt, Alfred Duka, i ka cilësuar si të pabazuara në prova pretendimet e prokurorisë. Gjykata i dha të drejtë prokurorisë.
Pas përfundimit të seancës për caktimin e masës së sigurisë, avokati Duka u shpreh se për akuzën më të rëndë ndaj klientit të tij, atë të “plagosjes së rëndë me dashje”, nuk ka asnjë rrethanë konkrete. Sipas tij, edhe nëse do të merrej e mirëqenë se Drobaj kishte hedhur kaspollë në drejtim të grumbullit me punonjës policie, nuk ka pasur qëllim të dëmtojë ata.
“I mbrojturi prej meje ka dalë në protestë për të mbrojtur banesën e tij, nuk ka ushtruar dhunë ndaj policisë, protesta është e drejta e tij dhe nuk ka pranuar ta shoqërojnë në ambientet e policisë”, tha avokati. Sipas deklarimeve të tij ndaj të riut është ushtruar dhunë duke e goditur në pjesë të ndryshme të trupit.
