Prokuroria e Përgjithshme thërret “Mbledhjen e Përgjithshme të Prokurorëve” më 11 dhjetor, për të votuar 6 anëtarët e Këshillit të Lartë të Prokurorisë, që zgjidhen nga rradhët e prokurorëve, pas përfundimit të procesit të rivlerësimit për kandidatët.
Prokurorja e Përkohshme e Përgjithshme Arta Marku njoftoi pasditen e të martës se do të thërriste “Mbledhjen e Përgjithshme të Prokurorëve”, për të votuar 6 anëtarët e Këshillit të Lartë të Prokurorisë, që zgjidhen nga rradhët e prokurorëve. Mbledhja do të mbahet në Tiranë më 11 dhjetor dhe do të sjellë edhe krijimin e institucionit të parë të drejtësisë të parashikuar nga reforma, pas më shumë se dy vjetësh nga votimi i ndryshimeve kushtetuese.
Përfundimi i procesit të vetingut për prokurorin Besnik Cani, ka mbyllur rivlerësimin për kandidatët prokurorë të KLP-së dhe sipas Prokurorisë së Përgjithshme ajo ka marrë njoftim për këtë nga Komisioni i Pavarur i Kualifikimit ditën e martë. “Komisioni i Pavarur i Kualifikimit, me shkresën nr.7995/I prot., ka dërguar listën me emrat e kandidatëve prokurorë që e kaluan me sukses procedurën e rivlerësimit”, thuhet në njoftimin e PP.
Në shkurt në kuvend kaluan me short dhe automatikisht për shkak se opozita nuk pranoi të votonte 5 anëtarët jo prokurorë të KLP-së. Aty u zgjodhën avokatët: Tartar Bazaj dhe Nurihan Seiti (Metaj), pedagogët Gent Ibrahimi e Sandër Beci dhe Alfred Balla nga Shoqëria Civile.
Votimi i 6 anëtarëve prokurorë dhe formimi i KLP-së hap rrugën për ngritjen e Prokurorisë së Posaçme (SPAK), zgjedhjen e një Prokurori të Përgjithshëm dhe njëkohësisht plotësimin me emërime të strukturave të prokurorive ku një pjesë e drejtuesve janë të komanduar.
“Për këtë arsye, thirret Mbledhja e Përgjithshme e Prokurorëve për zgjedhjen e anëtarëve prokurorë të Këshillit të Lartë të Prokurorisë dhe njoftohen prokurorët e prokurorive të të gjithë niveleve se mbledhja do të zhvillohet në datën 11.12.2018, ora 09.00, në ambjentet e hotel “MAK Albania”, Tiranë. Ju bëjmë me dije gjithashtu, se, në bazë të ligjit nr.115/2016, nenit 112, pjesëmarrja në Mbledhjen e Përgjithshme të prokurorëve për zgjedhjen e anëtarëve të Këshillit të Lartë të Prokurorisë, është e detyrueshme”, thuhet në njoftimin e Prokurorisë së Përgjithshme.
