Ish-komandanti i Ushtrisë Çlirimtare të Kosovës Rrustem Mustafa tha pas marrjes në pyetje në Hagë se i ishin bërë “pyetje shumë serioze” pasi ishte ftuar si “dëshmitar i dyshuar”.
Pas nëntë orë marrje në pyetje në Prokurorinë e Specializuar në Hagë, ish-komandanti i Ushtrisë Çlirimtare të Kosovës Rrustem Mustafa tha për mediat të martën se ishte pyetur për “çështje shumë serioze” pa dhënë detaje të mëtejshme.
“Ju e dini që ka qenë intervista e gjatë, sot përfundoi. Pyetjet kanë qenë shumë serioze, dhe ne kemi qenë edhe ne shumë serioz gjatë përgjigjeve dhe sapo kemi përfunduar,” tha Mustafa.
Ai tha se ishte ftuar si një “dëshmitar i dyshuar”, por nuk e sqaroi nëse kjo donte të thoshte se ai ishte i dyshuar për krime lufte apo si një dëshmitar i tyre.
Zëdhënësi i Prokurorisë së Specializuar në Hagë, Christopher Bennett, tha për BIRN më 7 dhjetor se “Prokuroria e Specializuar nuk jep informacione mbi statusin e hetimit, por synon të garantojë se të gjitha akuzat e përmbajtura në raportin e Asamblesë Parlamentare të Këshillit të Europës të përpiluar nga senatori zviceran Dick Marty janë trajtuar dhe janë hetuar plotësisht”.
Raporti i Dick Marty, i publikuar në vitin 2010, ngriti akuzat se disa ish-zyrtarë të lartë UÇK-së ishin përgjegjës për shkelje të rënda të të drejtave të njeriut.
Një gjykatë në Prishtinë në vitin 2013 e dënoi Mustafën me katër vjet burg për torturimin e të burgosurve të kohës së luftës në një qendër paraburgimi të UÇK-së në Llapashticë gjatë konfliktit të viteve 1998-1999 me forcat serbe.
Të bashkë-akuzuarit me të në gjyq, Latif Gashi dhe Nazif Mehmeti, gjithashtu ish-komandantë të UÇK-së, u dënuan përkatësisht me gjashtë dhe tre vet burg.
Një gjykatë apeli më vonë la në fuqi vendimet kundër treshes, të cilët njiheshin si Grupi i Llapit.
Mustafa tha se ai ishte pyetur “nëse unë do ta mbroj UÇK-në. Unë po ju them se UÇK-ja më ka mbrojtur mua. Unë nuk kam pasur nevojë të mbroj Ushtrinë Çlirimtare të Kosovës,” tha ai më parë të hënën.
Prokuroria e Specializuar në Hagë të mërkurën do të marrë në pyetje një tjetër ish-komandant të UÇK-së, Sami Lushtaku, i cili shkoi në Hagë bashkë me Mustafën dhe tregoi gjithashtu gatishmëri për të bashkëpunuar me gjykatën.
Dhomat e Specializuara dhe Prokuroria e Specializuar e Kosovës janë pjesë e sistemit ligjor të Kosovës, por ndodhen në Holandë dhe kanë për detyrë të hetojnë dhe të gjykojnë të dyshuarit për krimet e kryera gjatë dhe menjëherë pas luftës së Kosovës, në vitet 1998-2000.
E ashtuquajtura Gjykatë Speciale pritet të padisë figura të larta të UÇK-së për krime të dyshuara ku përfshihen vrasje, rrëmbime, ndalime të paligjshme dhe dhunë seksuale. Ajo nuk ka bërë ende publike asnjë akuzë.
Ish-zyrtarë të tjerë të lartë dhe ish-anëtarë të UÇK-së kanë deklaruar se janë thirrur nga Haga dhe se do të merren në pyetje në ditët në vazhdim.