Dy nga miqtë më të afërt të Uashingtonit në Ballkan, Shqipëria dhe Kosova, kanë njohur presidentin e ri të vetëshpallur të Venezuelës, Juan Guaido, njësoj si një sërë aleatësh të tjerë të SHBA-së në botë.
Pak kohë pasi kreu i opozitës së Venezuelës, Juan Guaido, e deklaroi veten si president i ligjshëm i vendit, në vend të presidentit Nicolas Maduro, Shqipëria dhe Kosova u bashkuan me një mori vendesh anembanë botës duke njohur pretendimin e tij.
Kryeministri i Shqipërisë, Edi Rama, tha se Shqipëria e njihte këtë akt. “Në emër të popullit të Shqipërisë, i uroj Juan Guaido dhe venezuelianëve të guximshëm suksese në largimin e pushtetit të paligjshëm që e ka kthyer vendin e tyre në ferr për popullin e vet,” shkroi ai në Twitter.
Guaido e shpalli veten president me mbështetjen e fortë të Shteteve të Bashkuara, Kanadasë, Brazilit dhe shumicës së vendeve të tjera në Amerikën Latine, me përjashtim të Meksikës, Kubës dhe disa shteteve të tjera të krahut të majtë që mbështesin regjimin socialist të Maduros.
Kosova bëri të njëjtën gjë, edhe pse Venezuela nuk e ka njohur pavarësinë e Kosovës.
Ministri i Jashtëm dhe zv/kryeministri Behgjet Pacolli shkroi të enjten: “Në emër të popullit dhe qeverisë së Kosovës për Juan Guaido dhe popullin e Venezuelës: Ju urojmë më të mirën në rrugën tuaj për të rivendosur demokracinë dhe ne jemi me ju derisa #Libertad të rivendoset.”
The Guardian i Mbretërisë së Bashkuar ka raportuar se presidenti i SHBA-së Donald Trump ka paralajmëruar se “të gjitha opsionet janë në tryezë” nëse Maduro, i cili ka mbajtur pushtetin që nga viti 2013, i përgjigjet me forcë të re opozitës. Të paktën 13 vetë kanë vdekur në Karakas gjatë protestave të ditëve të fundit.
Zv/presidenti amerikan Mike Pence tha se SHBA do të përdorë “peshën e plotë të presionit tonë diplomatik dhe ekonomik” kundër regjimit të Maduros.
Zyrtarët amerikanë thanë se Uashingtoni do të shikonte mënyrat për të transferuar asetet e Venezuelës dhe të ardhurat e naftës Guaidos dhe asamblesë kombëtare të drejtuar nga opozita.
Maduro ka kryesuar kaosin ekonomik në rritje në Venezuelën dikur të pasur. Fluksi i refugjatëve ekonomik që largohen nga vendi për t’i shpëtuar mungesës së ushqimit dhe ndërprerjes së energjisë elektrike dhe që tani ka arritur në më shumë se 3 milionë banorë, ka futur në panik vendet fqinje. Inflacioni ka arritur në disa milion për qind.
Presidenti i Këshillit të BE-së Donald Tusk mbështeti vendimin e SHBA-së, duke thënë se “ndryshe nga Maduro”, Asambleja Kombëtare e Guaidos ka “një mandat demokratik nga qytetarët e Venezuelës”.
Por Rusia, Irani, Siria dhe Kina kanë mbështetur Maduron, me Kremlinin që akuzon SHBA-në se po organizon një tentativë për grusht shteti.
Kina dhe Rusia i kanë huazuar Venezuelës shuma të mëdha, të cilat mund të jenë në rrezik nëse regjimi në Karakas ndryshon.
