Prokuroria për Krime të Renda njoftoi se është duke kryer hetime në lidhje me një rast të dyshuar korrupsioni ku mendohet të jetë i përfshirë edhe Spartak Çoçoli, prokuror i Prokurorisë së Rrethit Gjyqësor Gjirokastër.
Prokuroria njoftoi se me kërkesë të saj Gjykata e Shkallës së Parë të Krimeve të rënda kishte dhënë masë sigurie “detyrim për paraqitje”, ndaj prokurorit Spartak Çoçoli. Prokuroria tha se ai ishte “I dyshuar për veprën penale të “Korrupsionit pasiv të gjyqtareve, prokurorëve dhe funkionarëve të tjerë të drejtësisë””. Ndaj Çoçolit po ashtu është marrë masë për pezullimin e ushtrimit të detyrës.
Pak ditë më parë, kur u mor në pyetje prej Prokurorisë së Krimeve të Rënda në Drejtorinë e Policisë në Gjirokastër, Çoçoli mohoi akuzat duke thënë se ato “ishin të pavërteta”.
Ndërkohë sipas njoftimit zyrtar të prokurorisë dy persona të tjerë u arrestuan në lidhje me këtë ngjarje. “Në kuadër të procedicmit penal nr. 08/2019 për veprat penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë” dhe “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”, ditën e sotme (të ejten) është ekzekutuar vendimi Gjykatës së Shkallës së Parë për Krime të Rënda për caktimin e masave të sigurimit personal “arrest ne burg” për Ervin Hysajn dhe Ernest Duron”, thuhet në njoftim.
Sipas prokurorisë ata dyshohet se në bashkëpunim me njëri-tjetrin kanë tentuar të korruptojnë prokurorin Çoçoli. Ernest Duro akuzohet po ashtu edhe për veprën penale “Deklarata të rreme përpara oficerit të policisë gjyqesore”.
