Pas një takimi pa rezultat mes pedagogëve protestues dhe ministres së re të arsimit Besa Shahini, asambleja e pedagogëve të fakultetit të shkencave sociale shpallën grevë, e para protestë nga të punësuarit e sektorit publik në Shqipëri që nga viti 2003.
Asambleja e pedagogëve të Fakultetit të Shkencave Sociale shpalli grevë pa afat mbrëmjen e të premtes pasi një takim i zhvilluar mes një grupi pedagogësh dhe ministres së re të arsimit Besa Shahini dështoi të sjellë rezultat.
Pedagogët kërkojnë shfuqizimin e ligjit aktual për arsimin e lartë, i cili u miratua në Kuvendin e Shqipërisë mes debateve në vitin 2015 dhe që parashikon kontroll direkt apo indirekt nga qeveria mbi universitetet shqiptare dhe që gjatë viteve të fundit ka shkaktuar përplasje të vazhdueshme dhe bllokime të ndërsjellëta mes udhëheqësve të fakulteteve dhe universiteteve dhe të ashtuquajturve administratorë, të cilët konsiderohen gjerësisht si përfaqësues të qeverisë.
Protesta e pedagogëve erdhi pasi qeveria u përpoq pa shumë sukses të kontrollojë zemërimin e studentëve, të cilët protestuan në rrugët e Tiranës gjatë muajit dhjetor dhe bllokuan procesin mësimor gjatë muajit janar.
“Ne, pedagogët e Fakultetit të Shkencave Sociale, të mbledhur në asamble, të frymëzuar nga protesta studentore, të indinjuar nga mungesa e përgjigjes së Ministrisë së Arsimit, Sportit dhe Rinisë për kërkesat tona dhe në mbështetje të vendimeve të asamblesë së personelit akademik të FSHS të datës 15 janar 2019 dhe të takimit të përbashkët të asambleve të Universitetit të Tiranës të datës 25 janar 2019 vendosëm të nisim grevën”, shkruhet në një deklaratë të shpërndarë për mediat.
Kjo është hera e parë që nga viti 2003 kur punonjës të sektorit publik ngrihen në grevë kundër qeverisë. Hera e fundit, më shumë se 15 vite më parë, shënoi protestën e organizuar nga sindikatat të mësuesve të shkollave. Që nga ajo kohë sindikatat efektivisht kanë pushuar së ekzistuari ndërsa pas protestës studentore të dhjetorit të kaluar, pedagogët e disa fakulteteve të ndryshme kanë zgjedhur të veprojnë përmes asambleve të pedagogëve.
Link: Deklarata
