Kërkesa e Gjykatës për Krime të Rënda për zbardhjen e disa përgjimeve që janë pjesë të dosjes hetimore, ka shtyrë hapjen e procesit gjyqësor ndaj tre gjyqtarëve të apelit të akuzuar për korrupsion, si pjesë të ashtuquajturës dosje ‘El Classico.”
Pamundësia për zbardhjen e disa përgjimeve, transkriptimi i të cilave i është lënë detyrë Prokurorisë nga Gjykata për Krime të Rënda, po mban peng fillimin e gjykimit për korrupsion të gjyqtarëve të Apelit Durrës, Kliton Spahiu, Petraq Dhimitri dhe Petrit Çeno.
Ndërkohë, zhvillimi i një seance paraprake për këtë çështje të premten në Gjykatën e Shkallës së Parë për Krime të Rënda, dështoi për shkak të mungesës së avokatit mbrojtës të tre gjyqtarëve të akuzuar.
Gjykata e Shkallës së Parë për Krime të Rënda vendosi në dhjetor 2018 që të mos e shqyrtoje çështjen pa u zbardhur disa përgjime të cilat i ka vlerësuar se duhet të jenë pjesë e dosjes hetimore. Një burim nga Prokuroria i tha BIRN se një pjesë e përgjimeve që u lanë detyrë nga gjykata janë zbardhur, ndërsa disa të tjera pritet të zbardhen në ditët në vijim.
Në fund të nëntorit të vitit të kaluar, Prokuroria dërgoi për gjykim gjyqtarët Kliton Spahiu, Petraq Dhimitri dhe Petrit Çeno nën akuzën “korrupsioni pasiv i gjyqtarëve, prokurorëve apo punonjësve të drejtësisë”. Ndërkohë, për gjykim ka shkuar edhe biznesmeni që dyshohet se është favorizuar nga tre gjyqtarët, Namik Sadiku, i cili akuzohet për veprën penale “korrupsioni aktiv”.
Në shkurt të vitit 2018, Këshilli i Lartë i Drejtësisë vendosi të pezullonte nga detyra gjyqtarët e sipërcituar, duke argumentuar se vendimi u mor pasi u njohën me informacionin e ardhur nga Drejtuesi i Prokurorisë së Shkallës së Parë për Krimet e Rënda, ku njoftohej marrja si të pandehur të tre gjyqtarëve të Apelit të Durrësit .
Të dhënat e siguruara më parë nga BIRN prej dosjes hetimore tregojnë se tre gjyqtarët dyshohet se kanë ndërmarrë një udhëtim në Spanjë në tetor 2014 në shoqërinë e biznesmenit Namik Sadiku – pronari i një kompleksi turistik në Durrës dhe se udhëtimi është paguar prej tij. Ky udhëtim përfshinte ndjekjen e ndeshjes së futbollit midis Real Madrid dhe Barcelonës. I ashtuquajturi derbi “El Classico” u mbajt në Madrid në 25 tetor 2014 dhe u fitua me rezultatin 3:1 nga skuadra pritëse e Realit të Madridit.
Autoritetet spanjolle i kanë bërë të ditur prokurorisë se pagesa e hotelit në Spanjë është bërë përmes kartës së kreditit të shtetasit Fatjon Pula, i cili është kushëri i shtetasit Namik Sadiku. Ai ka paguar 450 euro për qëndrimin e gjyqtarëve në hotel.
Sipas Prokurorisë, qëllimi i udhëtimit në Spanjë i të dyshuarve ishte ndjekja në stadium e ndeshjes së futbollit mes Real Madrid dhe Barcelonës. Ndërkohë, më herët, më 2 tetor 2014, gjyqtarët Spahiu dhe Dhimitri kanë udhëtuar drejt Italisë në të njëjtën linjë dhe avion me Sadikun. Nga hetimi ka rezultuar se gjyqtarët dhe biznesmeni janë kthyer nga Italia në të njëjtën ditë dhe orë.
Ndërmjet udhëtimeve në Europë, Sadiku ishte palë një çështje gjyqësore në Gjykatën e Apelit Durrës, ku relator ishte gjyqtari Spahiu dhe anëtarë të trupit gjykues ishin Petrit Çeno dhe Petraq Dhimitri.
Sipas të dhënave që BIRN disponon, konflikti gjyqësor lidhet me ndërtimin e hotelit 10 katësh të Sadikut në plazhin e Durrësit, në zonën e Shkëmbit të Kavajës. Në shkurt të vitit 2012, Sadiku ishte paditur nga ish-ortaku i tij në ndërtimin e kompleksit, Oliver Ushina i cili kishte dalë fitues në Gjykatën e Rrethit Gjyqësor Durrës. Por, Gjykata e Apelit e ka rrëzuar vendimin e Shkallës së Parë duke i dhënë të drejtë Sadikut.
Tre gjyqtarët e akuzuar kanë një karrierë të gjatë në sistemin shqiptar të drejtësisë. Petrit Çeno drejton prej vitit 2010 Gjykatën e Apelit të Durrësit, ndërsa në vitin 2013 ai u dekretua nga presidenti Bujar Nishani në Gjykatën e Lartë. Por Çeno mbeti në Apel pasi Kuvendi rrëzoi dekretin e promovimit të tij.
Gjyqtari Kliton Spahiu është emëruar në Apelin e Durrësit pas disa vitesh karrierë në Gjykatën e Kurbinit, ndërsa Petraq Dhimitri punon prej vitit 2010 në këtë gjykatë.
Në deklaratat e pasurisë të dorëzuara në Inspektoratin e Lartë të Deklarimit dhe Kontrollit të Pasurive rezulton se gjyqtari Kliton Spahiu ka raportuar disa skedina fituese për të justifikuar pasurinë. Ai ka deklaruar se ka fituar në total 2,791,676 lekë dhe 4,246 dollarë prej lotove sportive në vitet 2012-2014.
