Gjykata e Krimeve të Rënda vendosi t’i japë edhe një muaj kohë Prokurorisë për çështjen ndaj tre gjyqtarëve Kliton Spahiu, Petraq Dhimitri dhe Petrit Çeno, të cilët akuzohen për korrupsion pasiv.
Gjykata e Krimeve të Rënda vendosi në një seancë paraprake të hënën të shtyjë me një muaj hetimet për tre gjyqtarët e Apelit të Durrësit, të cilët akuzohen për veprën penale të korrupsionit pasiv. BIRN mësoi se shkak për këtë shtyrje të hetimeve janë bërë përgjimet telefonike, të cilat nuk janë zbardhur ende plotësisht.
Prokuroria e Krimeve të Rënda i mbylli hetimet në nëntor të vitit të kaluar ndaj gjyqtarëve Kliton Spahiu, Petraq Dhimitri dhe Petrit Çeno. Ndërkohë, për gjykim ka shkuar edhe biznesmeni që dyshohet se është favorizuar nga tre gjyqtarët, Namik Sadiku, i cili akuzohet për veprën penale “korrupsioni aktiv”.
Gjykata e Shkallës së Parë për Krime të Rënda vendosi në dhjetor 2018 që të mos e shqyrtoje çështjen pa u zbardhur disa përgjime të cilat i ka vlerësuar se duhet të jenë pjesë e dosjes hetimore. Një burim nga Prokuroria i tha BIRN se një pjesë e përgjimeve që u lanë detyrë nga gjykata janë zbardhur, ndërsa disa të tjera pritet të zbardhen në ditët në vijim.
Të dhënat e siguruara më parë nga BIRN tregojnë se tre gjyqtarët dyshohet se kanë ndërmarrë një udhëtim në Spanjë në tetor 2014 në shoqërinë e biznesmenit Namik Sadiku – pronari i një kompleksi turistik në Durrës dhe se udhëtimi është paguar prej tij. Ky udhëtim përfshinte ndjekjen e ndeshjes së futbollit midis Real Madrid dhe Barcelonës, i njohur si derbi “El Classico”.
Autoritetet spanjolle i kanë bërë të ditur prokurorisë se pagesa e hotelit në Spanjë është bërë përmes kartës së kreditit të shtetasit F.P., i cili është kushëri i shtetasit Sadiku. Ai ka paguar 450 euro për qëndrimin e gjyqtarëve në hotel.
Sipas Prokurorisë, qëllimi i udhëtimit në Spanjë i të dyshuarve ishte ndjekja në stadium e ndeshjes së futbollit mes Real Madrid dhe Barcelonës. Ndërkohë më herët, më 2 tetor 2014, ka rezultuar se gjyqtarët Spahiu dhe Dhimitri kanë udhëtuar drejt Italisë në të njëjtën linjë dhe avion me Sadikun. Nga hetimi ka rezultuar se gjyqtarët dhe biznesmeni janë kthyer nga Italia në të njëjtën ditë dhe orë. Biznesmeni Sadiku ishte palë një çështje gjyqësore në Gjykatën e Apelit Durrës, ku relator ishte gjyqtari Spahiu dhe anëtarë të trupit gjykues ishin Petrit Çeno dhe Petraq Dhimitri.
Sipas të dhënave që BIRN disponon, konflikti gjyqësor lidhet me ndërtimin e një hoteli 10 katësh të Sadikut në plazhin e Durrësit, në zonën e Shkëmbit të Kavajës. Në shkurt të vitit 2012, Sadiku ishte paditur nga ish-ortaku i tij në ndërtimin e kompleksit, Oliver Ushina i cili kishte dalë fitues në Gjykatën e Rrethit Gjyqësor Durrës. Por, Gjykata e Apelit e ka rrëzuar vendimin e Shkallës së Parë, duke i dhënë të drejtë Sadikut.
