Ministrja e Mbrojtjes i ka kërkuar presidentit shkarkimin e Komandantit të Forcës Detare, ndërsa ka firmosur shkarkimin e 15 ushtarakëve të tjerë të gjetur prej një hetimi administrativ si përgjegjës për mungesën e sigurisë në bazën e Pashalimanit.
Ministrja e Mbrojtjes Olta Xhaçka i ka kërkuar Presidentit Ilir Meta shkarkimin e Komandantit të Forcës Detare Ylber Dogjani , ndërsa me kërkesë të Shtabit të Përgjithshëm ka miratuar shkarkimin e 15 ushtarakëve të tjerë. Masat janë marrë sëfundmil pas grabitjes së një sasie armatimesh dhe disa armëve në Bazën Detare të Pashalimanit.
Këshilltarja për mediat e Ministrisë së Mbrojtjes Albana Agastra i tha BIRN në një telefonatë se ushtarakët e shkarkuar ishin gjetur përgjegjës për mungesën e sigurisë në bazën e Pashalimanit pas një hetimi administrativ. “Ministrja me porpozim të Shtabit të Përgjithshëm miratoi shkarkimin e 15 ushtarakëve dhe i ka propozuar Presidentit që është Komandant i Përgjithshëm i Forcave të Armatosura, shkarkimin e Komandantit të Forcës Detare Ylber Dogjani”, tha Agastra.
I kontaktuar nga BIRN në telefon gjenerali Dogjani tha se nuk do të komentonte njoftimin. “Nuk kam dijeni për këtë”, tha Dogjani i cili mban gradën e Gjeneralmajorit. Ai u caktua në krye të Forcës Detare nga ish-Presidenti Bujar Nishani me propozim të ministres së atëherëshme të Mbrojtjes Mimi Kodheli. Më herët ai ka drejtuar Agjencinë e Inteligjencës së Mbrojtjes (AIM) e njohur edhe si SHIU, ndërsa është njëkohësisht bashkëkryetar i grupit të caktuar për negociata me Greqinë për kufirin detar.
Katër ushtarakë të niveleve të ulëta janë ndërkohë në burg me akuzën e “shkeljes së rregullave të shërbimit të rojes” me pasojë vjedhjen e depos së armatimeve në Pashaliman. Depoja e armatimit e bazës së Pashalimanit, e famshme në të shkuarën për katër nëndetëset sovjetike, u konstatua e grabitur më 10 janar. Bazuar në kërkesën për masë sigurie që prokuroria paraqiti në gjykatë më 14 janar, në depo ishin vjedhur 2 pushkë automatike “Model 56”, një karabinë, 40 granata dhe rreth 5500 fishekë të llojeve të ndryshme përfshi municione blindshpuese.
Por gjatë seancës për masë sigurie ushtarakët e arrestuar u ankuan për mungesë të kushteve në Pashaliman dhe po ashtu edhe për mungesë të elementëve minimalë të sigurisë përfshi ndriçimin në zonën ku ndodhej depoja e grabitur. Ushtarakët po ashtu pretenduan se punonin me orë shtesë për shkak të mungesës së personelit dhe dy prej tyre punonin aty në kundërshtim me urdhërat e Ministrisë së Mbrojtjes.