Disa ndryshime në rregulloren e punës së Kuvendit të Shqipërisë, të propozuara fillimisht në janar 2018 dhe që duket se përforcojnë rolin e kuvendit në rastet e arrestimeve të deputetëve apo ministrave, u rikthyen për shqyrtim nga maxhoranca socialiste duke u miratuar mes debateve në Komisionin Parlamentar të Ligjeve.
Një vit më parë, në janar 2018, deputeti Taulant Balla propozoi disa ndryshime në rregulloren e Kuvendit të Shqipërisë, të cilat u kritikuan si të tilla që forcojnë imunitetin e deputetëve dhe ministrave në rast kërkesash për arrest apo arrestim në flagrancë. Të lëna në harresë që nga ajo kohë, propozimi Balla [Link], u rikthye në procedurën parlamentare të Mërkurën më 6 shkurt kur Komisioni Parlamentar i Ligjeve ku u miratua me votat e shumicës socialiste.
Maxhoranca dhe opozita debatuan mbi propozimet, ku pika më e debatueshme është përmendja e fjalës “provë” në procedurën e heqjes së imunitetit të një deputeti.
Propozimi aktual synon në veçanti ndryshime në nenet 118 dhe 119 të rregullores së funksionimit të Kuvendit, ku përcaktohet procedura e dorëzimit të një kërkese nga prokuroria për arrestim deputeti apo ministri si dhe miratimi i kësaj kërkese nga ana e kuvendit.
Propozimi thotë: “Kërkesa përmban një relacion të arsyetuar dhe të shoqëruar me provat që mbështesin kërkesën”.
Ky formulim është pak i ndryshëm nga rregullorja ekzistuese ku flitet për “dokumente shoqëruese” por jo për “prova” në mbështetje të kërkesës.
Çështja ishte veçanërisht sensitive në janar 2018, kur u bë fillimisht propozimi, për shkak se në atë kohë, maxhoranca socialiste sapo kishte dalë nga vendimi për të mos lejuar Prokurorinë të arrestonte ish-ministrin e Brendshëm Saimir Tahiri, pasi e shpalli akuzën e ngritur prej tij “të motivuar politikisht” dhe të pabazuar në prova.
Opozita argumentoi në atë kohë se pozicioni i Kuvendit nuk është i tillë që lejon shqyrtimin e ligjshmërisë apo provave të kërkesës së prokurorisë, pasi këto duhet të shqyrtohen nga gjykata.
Kjo është tentativa e dytë e shumicës socialiste që synon forcimin e imunitetit të deputetëve ndaj kërkesave për arrestim.
Në shtator të vitit të kaluar, Byroja e Kuvendit me votat e shumicës socialiste miratoi një dokument interpretues të “Kodit të Sjelljes” të deputetëve. Ndonëse në kodin e sjelljes shkruhet se deputeti nuk duhet të abuzojë me imunitetin e tij për të penguar arrestimin apo kontrollin e banesës, në dokumentin e interpretimit të këtij kodi shkruhet ekzaktësisht e kundërta, duke argumentuar se imuniteti parlamentar është një “filtër kontrolli” kundër përpjekjeve hipotetike nga prokurorët për të goditur “funksionimin e kuvendit” apo “pavarësinë” e këtij institucioni.
Link: Njoftimi i Kuvendit
Lexo më shumë:
“Filtër kundër destabilizimit”, parlamenti forcon imunitetin e deputetëve
Imuniteti i Saimir Tahirit thellon hendekun midis politikës dhe sundimit të ligjit
Deputetët socialistë propozojnë forcimin e imunitetit parlamentar