Politikani italian Antonio Tajani, kryetari i Parlamentit Europian, mohoi të ketë sugjeruar në një fjalim polemik se beson se Italia ka pretendime të vlefshme mbi pjesë të territorit kroat dhe slloven.
Antonio Tajani shprehu keqardhje të hënën për një deklaratë që ai bëri në një ceremoni të Luftës së Dytë Botërore në Trieste një ditë më parë në lidhje me “Istrian italiane dhe Dalmacinë italiane”, pasi pretendimet e tij territoriale për tokën kroate dhe sllovene shkaktuan zemërime në të dy vendet.
Por në fillim të një seance plenare të Parlamentit Europian të hënën pasdite, Tajani tha se fjalët e tij ishin keqinterpretuar.
“Me praninë time në ceremoni, desha të kujtoja mijëra viktima, italianë, por edhe kroatë dhe sllovenë,” tha ai.
“Në fjalimin tim doja të theksoja rrugën e paqes dhe pajtimit midis italianëve. Fola për Istrian dhe Dalmacinë italiane, por kjo nuk nënkupton përvetësim të territorit. Ne folëm për italianët, stërnipat dhe bijtë që ishin të pranishëm në këtë ceremoni,” shtoi ai.
Ai këmbënguli se qëllimi i tij nuk ishte të ofendonte asnjë dhe se donte “të dërgonte një mesazh paqeje midis popujve, në mënyrë që ajo që ndodhi të mos ndodhë më kurrë”.
Mediat italiane raportuan të dielën se në fjalimin e Triestes, Tajani tha: “Rroftë Trieste! Rroftë Istria italiane! Rroftë Dalmacia italiane!”
Kjo shkaktoi zemërimin në Kroaci, rajoni i të cilës i Istrias dhe pjesë të Dalmacisë u çlirua nga pushtimi italian gjatë Luftës së Dytë Botërore.
Zyrtarët shtetërorë kroatë e dënuan ashpër fjalimin e Tajanit. Kryeministri Andrej Plenkoviç, kreu i Bashkimit Demokratik Kroat, HDZ, në pushtet, tha se ai foli me Tajanin për çështjen.
“I thashë se ishim shumë të pakënaqur me një deklaratë të tillë, e cila është e papërshtatshme dhe kemi kërkuar një shpjegim,” tha Plenkoviç.
Presidentja kroate Kolinda Grabar Kitaroviç gjithashtu dënoi deklaratën e Tajanit. “Këto deklarata nuk ndihmojnë në pajtimin, bashkëjetesën dhe të gjitha vlerat e qytetëruara mbi të cilat është ndërtuar Bashkimi Europian,” tha ajo.
Partia Fshatare Kroate, HSS, një anëtare e asociuar e Partisë Popullore Europiane, PPE, pjesë e të cilës është edhe Tajani, kërcënoi se do të largohej nga grupi në shenjë proteste.
Në një postim në Tëitter, lideri i HSS Kreso Beljka e quajti “skandaloze” deklaratën e Tajanit dhe tha se partia e tij do të marrë një vendim për largimin nga PPE-ja dhe organi i saj qendror në mbledhjen e ardhshme.
Zyrtarët sllovenë gjithashtu u ankuan për deklaratën e Tajanit, me kryeministrin Marjan Sarec që e quajti atë “revizionizëm historik të paprecedent”, raportoi Politico.