Pasi zyrtarët e lartë të Shteteve të Bashkuara paralajmëruan Kosovën se marrëdhënia e saj me Uashingtonin ishte në rrezik për shkak të vendimit për të mbajtur taksat e larta për importet nga Serbia dhe Bosnja, kryeministri Haradinaj përsëriti se taksat do të vazhdojnë të mbeten në fuqi.
Kryeministri i Kosovës dukej i vendosur, pasi aleati më i madh i vendit, SHBA-ja, paralajmëroi se bashkëpunimi i ardhshëm ishte në rrezik nëse Kosova nuk heqë tarifat e larta që ka vendosur për importet nga Serbia dhe Bosnja dhe Hercegovina.
Një letër nga Zv/Ndihmësi i Shtetit i SHBA-së Matthew Palmer, Zv/Ndihmësja Laura Cooper dhe Drejtori Kryesor për Çështjet Europiane John Erath paralajmëroi Kosovën se po vendoste marrëdhëniet e saj me Uashingtonin në rrezik për tarifën 100 për qind që vendi vendosi për këto importe në fund të vitit të kaluar.
Kryeministri Ramush Haradinaj këmbënguli në qëndrimin e tij të mëparshëm, megjithatë, duke thënë se taksat do të hiqen vetëm kur Serbia të njohë pavarësinë e provincës së saj të mëparshme, të shpallur në vitin 2008.
“Ne e shpjeguam qëndrimin tonë, se e dua Amerikën, por nuk do t’ia dorëzohem Serbisë dhe Rusisë,” tha Haradinaj pas takimit me ambasadorin amerikan në Kosovë, Philip Kosnett, të martën.
Haradinaj foli pasi krerët e Kosovës u takuan të martën, pas marrjes së letrës nga tre zyrtarët amerikanë të cilët folën për prishje të mundshme të partneritetit të tyre nëse taksat nuk hiqen.
Kryeministri këmbënguli se taksat nuk u vendosën në shenjë hakmarrje për asnjë çështje.
“Taksa nuk ka lidhje me Amerikën apo me zhvillimet më të fundit në dialogun e ndërmjetësuar nga BE-ja, por është një përgjigje për 20 vjet të një konflikti të ngrirë dhe ne jemi të lodhur. Ne kërkojmë një marrëveshje përfundimtare Kosovë-Serbi me njohje reciproke. Unë dua ta heq taksën, por ajo duhet të lidhet me njohjen,” tha Haradinaj për mediat.
Kryeministri i kërkoi SHBA-së të kuptojë se Kosova ka pritur më shumë se 20 vjet që nga viti 2008 për një zgjidhje të mosmarrëveshjes mbi shtetësinë e saj me Serbinë dhe gjithashtu u kujtoi atyre besnikërinë e Kosovës.
“Unë i bëj thirrje Amerikës që të kuptojë se nuk ka njerëz jashtë Amerikës që e duan Amerikën më shumë sesa Kosova,” tha Haradinaj.
“Serbia po luan me ne, duke revokuar njohjet tona nga vendet e tjera. Ajo po kundërshton kufijtë tanë dhe po sulmon familjet e anëtarëve të Forcës së Sigurisë së Kosovës,” shtoi Haradinaj.
Me ndihmën e aleatit të saj, Rusisë, Serbia pretendon të ketë bindur një numër shtetesh të vogla anembanë botës që të tërheqin njohjen e tyre të mëparshme të pavarësisë së Kosovës.
Por letra tha se Kosova po vinte në rrezik bashkëpunimin e ardhshëm.
“Këto veprime dëmtojnë aftësinë e Shteteve të Bashkuara për të vazhduar bashkëpunimin me ju në një gamë të gjerë objektivash të përbashkëta,” thuhet në letrën dërguar të martën.
Ajo thoshte se duke qenë se Kosova kishte shpërfillur kërkesën e saj të mëparshme për revokimin e vendimit të taksës, SHBA-ja tashmë do të ndërmarrë hapa për të treguar shqetësimin e saj, “duke përfshirë edhe në lidhje me partneritetin tonë të sigurisë”, raportoi RTK.
Mes këtyre zhvillimeve, letra tha se SHBA kishte anuluar një vizitë të planifikuar të Gjeneralit të Gardës Kombëtare të Ajouas, Timothy Orr.
“Duke pasur parasysh veprimet e padrejta që ka ndërmarrë qeveria juaj, një vizitë e tillë do të ishte e papërshtatshme. Ne do të shikojmë me kujdes aspekte të tjera të bashkëpunimit tonë dhe do të shqyrtojmë nëse ato duhet gjithashtu të kufizohen,” vazhdonte letra.
Letra megjithatë këmbënguli së SHBA vazhdon të mbështesë Kosovën në arritjen e një marrëveshjeje gjithëpërfshirëse me Serbinë “të përqendruar në njohjen reciproke, e cila është e qëndrueshme, e zbatueshme dhe në dobi të të dyja palëve”.
Haradinaj tha se është i bindur se SHBA është ende e angazhuar për stabilizimin e Kosovës, Serbisë dhe të gjithë rajonit.
“Ne i kuptojmë shumë mirë çdo gjë që vjen nga Amerika dhe e kuptojmë se ata vënë në zbatim parimet e tyre,” tha ai.
Diplomatët amerikanë theksuan se qëllimi i vetëm i Uashingtonit është të shohë si Kosovën ashtu edhe Serbinë të veprojnë në mënyrë të përgjegjshme për t’u kthyer në rrugën e duhur të dialogut të udhëhequr nga BE-ja, duke e pezulluar tarifën si hapin e parë.
“Derisa ta keni bërë këtë, ne nuk mund ta rikthejmë marrëdhënien tonë me nivelin tonë të mëparshëm të fuqishëm,” paralajmëroi SHBA.
Kosova imponoi taksën 100 për qind mbi importet e Serbisë nëntorin e kaluar, pasi nuk arriti të anëtarësohej në Interpol, për të cilën ajo fajësoi lobimin serb.
Si SHBA-ja ashtu edhe BE-ja i kanë bërë thirrje Kosovës të heqë taksën e importit, duke thënë se ajo dëmton bisedimet e udhëhequra nga BE-ja me Serbinë dhe bie në kundërshtim me anëtarësimin e Kosovës në zonën rajonale të tregtisë së lirë, CEFTA.