Një propozim për ndryshim ligjor nga qeveria shqiptare kërkon shtyrjen e afatit të kartave të identitetit që skadojnë gjatë këtij viti deri në dhjetor.
Kartat e identitetit të cilat skadojnë mes datave 9 shkurt dhe 31 dhjetor 2019 do të mund të përdoren deri në 31 dhjetor 2019. Ky është propozimi i qeverisë me nismë nga Ministri i Brendshëm Sandër Lleshaj. Këshilli i Ministrave miratoi në një mbledhje të mërkurën më 13 shkurt propozimin e këtij ndryshimi ligjor, i cili do të duhet të miratohet në parlament para se të hyjë në fuqi. Në këtë mënyrë, qytetarët do të mund të votojnë në zgjedhjet e ardhshme për pushtetin vendor duke përdorur kartat e identitetit ekzistuese.
Shqipëria vendosi për herë të parë sistemin e kartave të identitetit në vitin 2009, pjesë e një kompromisi politik mes qeverisë së ish-kryeministrit Sali Berisha dhe Partisë Socialiste të kryeministrit aktual Edi Rama për të hequr certifikatat e lindjes si mjet identifikimi të votuesve. Për rrjedhojë, rreth një në tre shqiptarë u pajis me kartë identiteti brenda muajve të parë të vitit 2009, kohë kur qeveria përdori kërcënime të ndryshme, nga refuzimi për të shpërndarë pensionet për pensionistët pa kartë identiteti te ndalimi i gjimnazistëve për të dhënë provimet e lirimit nëse nuk ishin pajisur më parë me një të tillë.
Dhjetë vjet më vonë qeveria u përball me të njëjtin problem, ku një pjesë e shqiptarëve mund të mos kishin mundësi për të votuar në rast se nuk pajiseshin me kartë të re identiteti.
Kartat e identitetit në Shqipëri prodhohen nga një sipërmarrje private e quajtur ALEAT. Ajo u themelua në gusht 2008, fillimisht si një koncesion trevjeçar, i cili do të prodhonte pasaportat dhe kartat e identitetit për shqiptarët dhe pastaj do t'ia transferonte teknologjinë qeverisë shqiptare. Por me një veprim të papritur, pak para skadimit të koncesionit, në vitin 2012 qeveria vendosi ta zgjasë afatin në 30 vjet.
ALEAT rezulton një nga kompanitë më fitimprurëse në Shqipëri. Mes viteve 2009 dhe 2017, shqiptarët kanë paguar për kartat e identitetit dhe pasaportat rreth 30 miliardë lekë ndërsa kompania ka pasur një normë fitimi neto prej 21% ose 6.2 miliardë lekë ndërsa kapitali themeltar i shoqërisë është 620 milionë lekë.