Grupi parlamentar i Lëvizjes Socialiste për Integrim ka vendosur djegien e mandateve parlamentare, duke iu bashkuar kërkesës së PD-së për një qeveri tranzitore që do ta çonte vendin në zgjedhje të parakohshme.
Në një deklaratë për shtyp kryetarja Monika Kryemadhi njoftoi se grupi parlamentar i LSI-së ka vendosur që të heqë dorë nga mandatet parlamentare, për të vënë trysni mbi kryeministrin Edi Rama, të cilin e sheh si kreun e një mazhorance jo legjitime.
“Grupi Parlamentar i LSI vlerëson se djegia e mandateve është rruga e vetme për të rikthyer shtetin e së drejtës dhe legjitimitetin e qeverisjes përmes votës së lire,” tha Kryemadhi.
“Prandaj, Grupi Parlamentar, vendosi djegien e mandateve dhe mandatoi Kryetaren e LSI për të ndërmarrë të gjithë hapat statutore dhe politike në përmbushje të këtij vendimi,” shtoi ajo.
Sipas Kryemadhit LSI mbështet zgjidhjen e ofruar nga opozita e bashkuar me në krye Partinë Demokratike, për një qeveri tranzitore që do ta cconte vendin në zgjedhje të lira dhe të ndershme.
Kryetarja e LSI-së nënvizoi që se kjo qasje motivohej nga skandali i vjedhjes së votës i publikuar nga media, si dhe shqetësimin se mazhoranca kishte vënë nën kontroll sistemin e drejtësisë.
“Me vërtetimin botërisht nga media ndërkombëtare dhe dosjet gjyqësore të ilegjitimitetit të faktuar të kësaj qeverie dhe maxhorance për shkak të vjedhjes së votës dhe kriminalizimit të procesit zgjedhor nga kjo mazhorancë në zgjedhjet e 2017,” tha ajo.
Më herët edhe Partia Demokratike deklaroi se ka marrë vendim të tërheqë deputet e saj nga Kuvendi, duke hapur siparin për një krizë politike.
“Grupi parlamentar i Partisë Demokratike vendosi unanimisht djegien e mandateve në kuvendin e dalë nga votat e krimit dhe të mafias në zgjedhjet parlamentare të vitit 2017,” deklaroi kreu demokrat Lulzim Basha, duke nënvizuar se qeveria ishte ‘kapur në flagrancë duke vjedhur votat.”