Investimet dhe numri i investitorëve në fondet kolektive të investimeve në Shqipëri pësuan rënie gjatë vitit të kaluar duke ndjekur tendencën e depozitave në banka.
Numri i investitorëve në fondet shqiptare të investimit ra me 6% ndërsa asetet e menaxhuara nga këto fonde ranë me 9% ose 6.6 miliardë lekë, bëhet e ditur nga të dhënat statistikore të Autoritetit të Mbikëqyrjes Financiare.
Rënia në fondet e investimit duket se reflekton tkurrjen e përgjithshme të kursimeve në ekonominë shqiptare. Vitin e kaluar depozitat pësuan një rënie prej 1.3%.
Fondet kolektive të investimit janë kompani që grumbullojnë paratë nga një numër investitorësh dhe që i investojnë këto para përkundrejt një përqindjeje të mbajtur mbi fitimet e realizuara. Në rastin e Shqipërisë, shumica dërrmuese e fondeve të menaxhuara në këtë mënyrë investohen në tituj borxhesh të qeverisë shqiptare. Në Shqipëri funksionojnë pesë fonde investimesh, nga të cilat, tre i përkasin kompanisë Raiffeisen Invest.
Në fund të vitit të kaluar, afro 29 mijë shqiptarë kishin 66 miliardë lekë investime në këto fonde me një mesatare prej 2.3 milionë lekësh secili.
Fondi më i madh është Raiffeisen Invest në lekë me asete totale prej 47 miliardë lekësh me 23 mijë klientë. Fondi i dytë më i madh, Raiffeisen në euro ka 3,500 klientë dhe 10.3 miliardë lekë asete.
Fondet e investimeve filluan të krijohen një dekadë më parë në Shqipëri por numri i klientëve të tyre u rrit veçanërisht gjatë viteve të fundit pasi interesat e depozitave ranë në pothuajse zero në të gjitha bankat e vendit ndërsa fondet janë në gjendje të ofrojnë interesa më të larta. Interesat e përfituara nga fondet e investimit zakonisht reflektojnë çmimet e titujve të borxhit të qeverisë shqiptare.