Ambasada e SHBA-së në Tiranë dhe ambasadori i Delegacionit Europian Luigi Soreca kritikuan të Martën vendimin e dy partive opozitare për t’u tërhequr nga parlamenti si një masë që minon demokracinë.
Ambasada e Shteteve të Bashkuara të Amerikës në Tiranë dhe ajo e Delegacionit Europian i bënë thirrje të martën dy partive opozitare, PD dhe LSI, të tërheqin vendimin e tyre për tërheqjen nga parlamenti.
Ambasada e SHBA i cilësoi vendimet si një “minim të parimeve bazë të demokracisë” ndërsa i bëri thirrje deputetëve të opozitës të refuzojnë dhe të mos i dorëzojnë mandatet.
“Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme,” shkruhet në deklaratën e ambasadës.
“Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet,” shton deklarata.
Ambasadori i Delegacionit Europian në Tiranë Luigi Soreca deklaroi në një intervistë në Top Channel se “parlamenti nuk duhet bojkotuar”.
“Heqja dorë nga mandatet shkon kundër interesave të Shqipërisë”, deklaroi ai.
Partia Demokratike shpalli të hënën vendimin për “djegie” të mandateve të veta parlamentare në një vendim që kryetari Lulzim Basha deklaroi se ishte “unanim” nga grupi parlamentar. Po të hënën, Lëvizja Sovialiste për Integrim, partia e tretë parlamentare, shpalli gjithashtu vendimin për t’u tërhequr nga parlamenti.
Partitë politike shqiptare të të dyja krahëve politikë kanë përdorur shpesh në të shkuarën bojkotin e punimeve të Kuvendit të Shqipërisë si akt proteste ndaj qeverisë ndërsa faktori ndërkombëtar në vijimësi ka kritikuar bojkotin dhe ka bërë presion mbi opozitat për t’u kthyer në kuvend. Megjithatë, deklaratat e PD dhe LSI për “djegie” mandatesh, që nënkupton heqjen dorë nga mandatet e deputetëve me synimin e krijimit të vakancave, është një armë e re në politikën shqiptare.
Zbatimi në praktikë i një kërcënimi të tillë gjithsesi duket i vështirë. Sistemi zgjedhor shqiptar sanksionon zëvendësimin e vakancave parlamentare nga listat e kandidatëve të partive respektive dhe Partia Demokratike ka afërsisht tre kandidatë në listë për çdo post deputeti.
Për momentin kërcënimi për “djegie” mandatesh i është nënshtruar asaj që opozita e quan “procedurë”, që përfshin diskutimin në strukturat partiake.
Partia Demokratike tërheq deputetët nga Kuvendi i Shqipërisë