Vendimi i deputetëve të opozitës për të hequr dorë nga mandati në Parlament është komentuar edhe nga sekretari i Përgjithshëm i Këshillit të Europës, Thorbjørn Jagland.
Vendimi i partive të opozitës në Shqipëri për të hequr dorë nga mandatet parlamentare ka sjellë edhe reagimin e Këshillit të Europës. Sekretari i Përgjithshëm i Këshillit të Europës, Thorbjørn Jagland deklaroi të enjten se opozita nuk duhet të braktisë Parlamentin.
“Në një demokraci legjislatori është shkalla e parë ku çështjet politike që prekin të gjithë vendin duhet të debatohen dhe ku duhet të kërkohen zgjidhjet. Opozita shqiptare nuk duhet të braktisë parlamentin,” deklaroi Jagland.
Njësoj si përfaqësuesit e institucioneve ndërkombëtare, edhe Këshilli i Europës bëri thirrje për përmbajtje nga retorika e dhunshme dhe dhuna në rrugë. “E drejta e tubimit dhe e demonstrimit duhet të ushtrohet në mënyrë paqësore,” deklaroi Jagland.
Deputetët e Partisë Demokratike dhe ata të Lëvizjes Socialiste për Integrim vendosën të heqin dorë nga mandatet e tyre parlamentare, duke e akuzuar qeverinë e drejtuar nga Edi Rama për keqqeverisje dhe manipulim të votave. Kërkesa kryesore e tyre është largimi i Ramës, si dhe krijimi i një qeverie tranzitore për zgjedhje të lira.
Vendimi për djegien e mandateve vjen 4 muaj para zgjedhjeve vendore dhe përbën një precedent të pandodhur më parë në Shqipërinë e tranzicionit. Partitë politike në opozitë u kritikuan të enjten edhe nga zyrtarët e lartë të Brukselit, të cilët thanë se vendime të tilla janë kundërproduktive dhe minojnë progresin e Shqipërisë në rrugën drejt Bashkimit Europian.
Përmes një deklarate të përbashkët, Përfaqësuesja e Lartë Federica Mogherini dhe komisioneri Johannes Hahn kërkuan dialog konstruktiv mes qeverisë dhe opozitës për kapërcimin e situatës aktuale politike.
