Blerim Kuçi, një ish-komandant i Ushtrisë Çlirimtare të Kosovës, i cili tani është deputet i partisë së kryeministrit Ramush Haradinaj, tha se është thirrur për t’u marrë në pyetje nga Zyra e Prokurorit të Specializuar në Hagë.
Blerim Kuçi, i cili aktualisht është deputet me Aleancën për Ardhmërinë e Kosovës të Ramush Haradinajt, AAK, tha të enjten se ai është figura e fundit e lartë e Ushtrisë Çlirimtare të Kosovës që është thirrur për t’u marrë në pyetje nga Zyra e Prokurorit të Specializuar, e cila po heton krimet e luftës dhe të pasluftës në Kosovë.
“Sot mora ftesën dhe urdhrin për t’u paraqitur para prokurorit të lartë të Zyrës së Prokurorit të Specializuar në Hagë më 12 mars 2019,” shkroi Kuçi në një deklaratë të dërguar të enjten për mediat lokale.
Ai shtoi se ai “do të përmbushë detyrimin dhe do t’i përgjigjet këtij urdhri.”
Kuçi tha në deklaratë se është i bindur se përpjekja e gjykatës së Hagës për të barazuar luftën e Kosovës për liri me “krimet makabre” që Serbia kreu në Kosovë “gjithashtu do të dështojë siç ka ndodhur me të gjitha përpjekjet e tjera deri më tani”.
Kuçi ishte komandant i UÇK-së gjatë luftës në zonën e Suharekës.
Emri i tij u përmend gjatë gjykimit për krime lufte të Fatmir Limajt, një ish-komandant i UÇK-së tashmë i kthyer në politikan, i cili u akuzua për abuzimin dhe vrasjen e të burgosurve që mbaheshin në një ndërtesë paraburgimi të UÇK-së në Kleçkë, afër Suharekës.
Gjatë gjyqit u pretendua se Limaj urdhëroi vrasjen e Kuçit.
Kuçi u ndalua në prill 2011, por u lirua me kusht pasi nuk pranoi të fliste me gjyqtarët lidhur me rastin e Limajt. Limaj u gjet i pafajshëm.
Kuçi ishte Ministër i Brendshëm në vitin 2007 kur ishte pjesë e Lidhjes Demokratike të Kosovës, LDK.
Ai ishte një zyrtar i lartë i LDK-së derisa dha dorëheqjen si kreu ekzekutiv i partisë në vitin 2009 gjatë një mosmarrëveshjeje për lidershipin.
Ai më pas iu bashkua partisë AAK të Haradinajt në vitin 2010 për të kandiduar si kryetar i Suharekës, një post që ai e fitoi.
Zyra e Prokurorit të Specializuar në Hagë është ngarkuar me hetimin e të dyshuarve për krime të kryera gjatë dhe menjëherë pas luftës së Kosovës, nga viti 1998 deri në vitin 2000. Krimet besohet të përfshijnë vrasje, rrëmbime, ndalime të paligjshme dhe dhunë seksuale.
Dhomat e Specializuara të Kosovës më pas do të gjykojnë të dyshuarit, të cilët pritet të përfshijnë figura të larta të UÇK-së.